Ish-kryeministri Sali Berisha ka deklaruar se opozita nuk do pranojë emërimin e gjyqtarëve dhe prokurorëve nga të huajt, pasi Shqipëria nuk është protektorat dhe as Kosova e Shqipëria.
Berisha nga foltorja e Kuvendit, pasi ka përsëritur akuzat ndaj Ramës si i vetmi që nuk do konsensus e reformë në drejtësi, deklaroi se ai do ta votonte vetingun e gjyqtarëve dhe prokurorëve nga të huajt, nëse këtë do e kishin Rumania dhe Kroacia.
“Emërimin nuk e pranojmë. Emërimin ua kanë bërë protektorateve. Ua kanë bërë 2 vendeve, e ka Bosnja dhe Kosova. OKB të ndihmon të ndërtosh shtetin. Ju qenkeni pro amerikanëve ne jemi qesharakë. Ne udhëhiqemi nga një sens mirënjohje, por besojmë se po japim edhe ne kontributin tonë. Pse gjithë kjo e drejtë e opozitës, nga buron kjo? Sepse opozita nuk ka kërkuar qoftë edhe një favor minimal, përveçse ka bërë gjithçka që kjo reformë të miratohet. E thotë Venecia pse. Po ta lexosh opinionin me syzet e kryetarit të Partisë komuniste të drejtësisë Fatmir Xhafaj ashtu do e lexosh. Ndërkombëtarë nuk mund të emërojnë. Ju na kërkoni që të votojmë në parlament raportet e miqve tanë, miq të shkëlqyer. Kjo s’mund të ndodh sepse ata nuk kanë shtetësi shqiptare, se lejon kushtetuta shqiptare. Hajde të heqim nga Kushtetuta Shqipëria shtet sovran. Ju udhëhiqeni nga një psikologji e vjetër e bllokmenëve, që nxirrnin në treg çdo gjë të tyren vetëm port të ruajtur karrigen. Këtë bëjnë bijtë e tyre sot, shihni si lehin, sulmojnë opozitën”, deklaroi Berisha.
“Drita morale e opozitës do t’u verbojë ju, ajo ndricon mendjet e njerëzve. Rama kërkon që gjykatësit ti emërojnë të huajt, kërkon që të huajt të bëjnë një raport dhe ky raport të votohet në Kuvend, pra parlamenti të miratojë një raport që bëjnë të huajt që s’kanë detyrim ligjor e kushtetues ndaj vendit. E përjashtoj veten, jam sovranist, kjo i ka shërbyer kombit, por e përjashtoj veten, e kam shumë të lehtë, nuk insistoj në asgjë timen, por cfarë ndodh, në zhvillimet e fundit më thotë këtë ndryshim e ka Rumania e Kroacia. Nëse do e kishin këto vende, Berisha do e miratonte, pikë, se cdo bënte PD nuk e di, unë do e pranoja. Por më rezulton asnjë fjalë në kushtetutën rumune e kroate nuk ka për këtë” tha ai.
