Deputeti socialist Ben Blushi ka deklaruar sot se reforma në drejtësi është shumë afër dështimit. Në seancën e sotme Blushi ka vijuar me qendrimin kritik ndaj qeverisë, por edhe ndaj klasës politike, për të cilën tha se ka vetëm neveri. Blushi tha gjithashtu se Elvis Rroshi drejton Kavajën nga arresti shtëpiak, duke ironizuar se këtë mund ta bëjnë edhe të burgosurit.
Blushi ka folur edhe për aksidentin e djeshëm ku humbi jetën një 37-vjeçare. Ai tha se mungesa e drejtësisë në vend përbën rrezik për qytetarët e vendit dhe sigurinë e tyre. Duke u ndalur tek ngjarja e djeshme, ku një makinë shtypi për vdekje një nënë, e cila po kalonte rrugën me dy fëmijët e saj, Blushi tha se kjo ndodhi për shkak të mungesës së drejtësisë.
“Unë s’dua të bëj profetin e së keqes, por reforma në drejtësi është shumë afër dështimit. Sa aftësi ka kjo klasë politike për të zgjidhur çështje jetike për vendin. Nëse reforma në drejtësi nuk kalon në këtë sallë, ndoshta nuk ka për të ndodhur asgjë. çështja është kush janë kostot. Mungesa e drejtësisë në Shqipëri është e dhimbshëm. Një grua u vra dje në mes të Tiranës. A ka lidhje kjo me reformën në drejtësi? Ka, se ky çmenduri që e vrau është liruar nga Gjykata. Para 2 muajsh në autostradë një grua tjetër me 3 fëmijë, po shkonte të takonte burrin në burg. Trafik ndarësja në rrugë me vendim gjykate duhet të ishte në vend, po ja që nuk ishte këtu. Kjo është mizori, mënyra sesi shteti vret qytetarët e vet, duke shmangur drejtësinë”, tha Blushi.
Deputeti i është drejtuar sërish kreut të Bashkisë së Kavajës, duke përmendur faktin se ai qeveris njësinë bashkiake nga shtëpia, pasi ndodhet në “arrest shtëpie”.
“Këtu nuk ka drejtësi. Kavaja qeveriset sot nga një njeri, që nuk është kryetar bashkie, por qeveris nga shtëpia, se ka marrë arrest shtëpie. A mund të funksionojë kështu drejtësia. Edhe në Dibër po të shkojmë, Shukriu po kërkon kthimin në detyrë.
Një deputet këtu ka qenë, përdori armën për një punë të vetën personale. Po edhe Ballist Morina kishte një pistoletë pa leje, është në burg akoma. As europianin nuk pati mundësinë ta shihte, edhe pse ai pati kontribut që na çoi atje. Kjo është kosto e mungesës së drejtësisë. Pse nuk po ndodh reforma në drejtësi. Arsyeja e Lulit dhe Edit, dihet, se është një drejtësi e munguar për 25 vite. Mungesa e drejtësisë ka larguar investitorët e huaj, mungesa e drejtësisë largoi 1 mln shqiptarë nga vendi, mungesa e drejtësisë vrau dje një grua në rrugë”, tha Blushi.
