Kryeministri Edi Rama ka ftuar sërish kreun e opozitës në tryezë për reformën në drejtësi. Në një dalje për mediat pasi PD doli publikisht kundër propozimit hibrid amerikan për vetingun, Rama tha se PD kërkon të mbajë jashtë ndërkombëtarët pasi i frikësohet profesionalizmit të tyre në skanimin e gjyqtarëve dhe prokurorëve.
“PD refuzoi propozimin më të fundit për kompromis për reformën në drejtësi që e bëri në enër të SHBA e BE ndihmës sekretarja e Shtetit Victoria Nuland. Nuk më vjen i papritur ky refuzim i radhës se përgjatë 1 vit e gjysmë gjatë procesit të hartimit të draftit PD i ka dhënë sinjalet se nuk e do reformën në drejtësi. Fillimisht e ka bllokuar procesin, ka hyrë e ka dalë duke futur letra pa lidhje vetëm për ta ngatërruar, ka baltosur ekspertët e nivelit të lartë, ka abuzuar pa pushim me Opinionin e Venecias duke u kapur gjatë dimrit me pargarfin 55 dhe gjatë pranverës me paragrafin 88, si i mbyturi pas fijes së barit”, deklaroi Rama.
Ai tha se PD ka kundërshtuar propozimin hibrid sepse i friket profesionalizmit të ndërkombëtarëve në procesin e skanimit të gjykatësve dhe prokurorëve.
“Ka vetëm një hall: si të mos e kapë Edi Rama drejtësinë dhe ky hall zgjidhet me vendet e rezervuara. Pastaj do ta zgjidh hallin me vendet e blinduara. Kur ne e kemi pranuar edhe këtë propozim, ka marrë 48 orë kohë nga takimi me Nuland, jo për ta pranuar por për ta rrëzuar, duke nxjerrë një kundër propozim, që nxjerr në pah të vërtetën e fshehur 1 vit e gjysmë. PD nuk e ka pasur hallin tek vendet e rezervuara por ka rezerva për besueshmërinë, integritetin e partnerëve strategjikë të Shqipërisë. Nuk i do të huajt në për këmbë sepse i friket profesionalizmit të tyre në procesin e skanimi të gjykatësve dhe prokurorëve të Republikës së Shqipërisë”, tha Rama.
Kryeministri deklaroi se opozita ka dalë zbuluar para popullit dhe partnerëve ndërkombëtarë.
“E keni dëgjuar ndonjëherë PD të thotë se e ka hallin tek humbja e kontrollit mbi prokurorët e gjykatësit, me të cilët ka vrarë në Gërdec dhe bulevard? Të korruptuarve të saj nuk iu ka hyrë asnjë gjemb në këmbë. Natyrisht që nuk e keni dëgjuar. Por a keni dëgjuar të thonë që ndërkombëtarët duan të fusin hundët në punët e PD-së? Natyrisht jo, as këtë se kanë thënë kurrë. Do vinte dita të dilnin kaq zbuluar para popullit dhe partnerëve strategjikë”, u shpreh ai.
Rama tha se opozita ka kërkuar disa herë hetime nga ndërkombëtarët, ndërsa tani do të përjashtojë ata nga procesi i vetingut.
“Po tani, tani çfarë do thonë? Mos do thonë se halli është bërë edhe më i madh se Amerika dhe Evropa do kapin drejtësinë e pavarur shqiptare? Apo do thonë që ne e duam Amerikën dhe Evropën por duam më shumë Shqipërinë sovrane. Shpresoj që ju nuk e keni harruar që sa herë ka ndodhur që PD të kërkojë hetim ndërkombëtar, madje edhe FBI-në, të vijnë këtu të zbardhin skandale të sajuara nga ata vetë. Ka kërkuar edhe hetim në Kuvend”, tha ai.
Në përfundim Rama tha se ka ende shpresë dhe ftoi kreun e PD-së në diskutim për të ardhmen e Shqipërisë Europiane.
