David Cameron dha zyrtarisht dorëheqjen si Kryeministër i Britanisë së Madhe dhe dorëzoi detyrën tek Mbretëresha.
Tashmë Britania do të drejtohet nga një femër, Theresa May, të cilës detyra e Kryeministres iu dorëzua nga Mbretëresha Elizabet.
Cameron mbajti fjalim duke deklaruar dorëheqjen dhe u shpreh se jo çdo vendim që ka marrë është i drejtë, por beson “se tani Britania është një shtet akoma më i fortë”.
Me të marrë detyrën, Theresa May doli në një deklaratë për mediat duke folur për herë të parë si Kryeministre e shtetit ishullor.
“Të gjithë britanikët duhet të jenë të bashkuar. Të dëgjojmë zërin e popullit dhe ta bëjmë vendin më të fuqishëm”, ka thënë ndër të tjera Kryeministrja e re.
Detyra e Theresa May është përshëndetur nga Bashkimi Europian dhe nga Shtëpia e Bardhë. Ajo bëhet Kryeministrja e dytë femër e Britanisë së Madhe pas Margaret Thatcher.
