Gjykata Kushtetuese ka vendosur të administrojë videot ku kryebashkiaku i Dibrës, Shukri Xhelili kërkon të bëjë seks me një punonjëse të tij në një nga hotelet e Tiranës.
Vendim është marrë në seancën e sotme të Kushtetueses, kur po shqyrtohet kërkesa e Xhelilit për të rrëzuar vendimin e Këshillit të Ministrave që e shkarkon atë nga detyra.
Vendimi nga Kushtetuesja do të merret në 19 korrik në seancën e orës 12:00. Shukri Xhelili vijon të mbetet në burg pasi edhe Gjykata e Apelit nuk i dha të drejtë atij.
Në seancat e zhvilluara ne Apel ish kryebashkiaku ka pretenduar se videoja është e montuar. Përmes avokatit të tij mbrojtës, Ferdinand Doja, ish-kryebashkiaku ka kërkuar një masë më të butë sigurie. Sipas burimeve pranë Gjykatës, avokati ka pretenduar mungesën e provave ligjore për mbajtjen të izoluar të klientit të tij.
Avokati ka paraqitur rezerva në lidhje me videoregjistrimin e kryer nga denoncuesja 20-vjeçare, për shkak se materiali video i është vënë në dispozicion Prokurorisë përmes një USB-je. Sipas avokatit, një material në USB është lehtësisht i manipulueshëm.
Avokati Doja ka përmendur disa vendime të Gjykatës së Lartë, ku videoregjistrime të fshehta nuk janë konsideruar provë për shkak se nuk dihet burimi origjinal i saj. Pretendimet e mbrojtësit janë kundërshtuar nga përfaqësuesi i Prokurorisë në sallën e gjyqit.
