“Importi i plehrave do të kishte pasoja katastrofale për ambientin, shëndetin e qytetarëve, për vendin në tërësi”.
Kështu deklaron demokrati Tritan Shehu, pas ditë pasi deputetë socialistë, të kryesuar nga Eduart Shalsi kanë depozituar në Kuvend një projektligj për importin e plehrave me arsyetimin se biznesi i riciklimit të vend është drejt falimentimit.
Në një status në facebook, Shehu iu bën thirrje qytetarëve të çohen kundër kësaj nisme. Ai shkruan se një ndryshim ligjor i tillë i shërben interesave të ngushta grupimesh, dëmton rëndë qytetarët, territorin e përmbushjen e standardeve tona europiane.
STATUSI I SHEHUT
Spekulimi i ri i maxhorancës: “Plehrat do të zhvillojnë ekonominë shqiptare dhe vendin”!
“Të lejojmë me ligj importin e gjerë të mbeturinave”, pra të legalizojmë plehrat e botës tek ne, “jo vetëm për riciklim, por dhe për depozitim e shkatërrim”!
Ky është vizioni më i fundit i të majtës i shprehur nëpërmjet deputetëve të saj, për të “stimuluar” industrinë tonë, për të “sjellë mirëqenie”..
Pas “idesë gjeniale” të legalizimit të kanabisit, sot kërkohet “legalizimi” i plehrave!
Si pasojë e të parës vendi është mbushur me atë drogë, jo për të mirën e qytetarëve, por për të zezën e tyre.
Tani kërkohet të mbushemi dhe me plehra të importuara, ndërsa ne aktualisht po “qelbemi” nga tonat e as mundemi t’i kontrollojmë, riciklojmë, administrojmë e shkatërrojmë qoftë dhe këto.
Një ndryshim i tillë ligjor, tipik ky për “boten e tretë”, do të kishte pasoja katastrofale për ambientin, shëndetin e qytetarëve, për vendin në tërësi.
Është krejt e kundërta e asaj që PS premtoi në programin e saj elektoral dhe për çfarë ka nevojë vendi.
Ne na duhet të forcojmë legjislacionin përkatës bllokues!
Mjafton të analizosh dëmet që i janë krijuar vendit vetëm nga lejimi i gabuar tashmë i importit të gomave të përdorura, të bllokuara më 1993, kupton problemet gjigande që do të krijonte ndryshimi ligjor i propozuar.
Në këto kushte jo vetëm shoqatat e grupimet ambientaliste, por i gjithë opinioni i ynë, ata që e duan këtë vend e banorët e tij, duhet të mobilizohen për të mos lejuar këtë fatkeqësi të re, që kërkohet t’i imponohet Shqipërisë.
Varfëria, papunësia, rënia ekonomike nuk mund të luftohen dhe as të minimizohen duke i “hapur dyert” plehrave të botës, përkundrazi!
Kjo gjë do të përkeqësonte gjendjen aktuale në tërësi, do të rrezikonte shëndetin e banorëve tanë.
Një ndryshim ligjor i tillë i shërben interesave të ngushta grupimesh, dëmton rëndë qytetarët, territorin e përmbushjen e standardeve tona europiane.
