Partia Demokratike ka deklaruar sot se heshtja dhe mosgjetja e autorëve të grabitjes në Rinas tregojnë se shteti ka rënë. Në një deklaratë për mediat, kreu i Departamentit të Rendit dhe Sigurisë në PD, Enkelejd Alibeaj tha se megjithëse kanë kaluar 10 ditë nga ngjarja, kryeministri Edi Rama hesht.
“Prej 10 ditësh, goditja më e rëndë e sigurisë kombëtare, pushtimi me armë e me maska i aeroportit të vetëm ndërkombëtar, është shoqëruar me heshtjen e plotë të Edi Ramës. Asnjë cicërimë prej tij, edhe pse ngjarja në mesditën e 30 qershorit në Rinas, konfirmoi rënien totale të shtetit, të çdo standardi sigurie në vend”, tha Alibeaj.
Sipas tij, Rama u përpoq me metoda bizantine të gjente fajtorë e përgjegjës jashtë vetes, por dështoi pasi faktet e bëra publike nga opozita, nga mediat dhe nga zyrtarët e Aeroportit, tregojnë se policia ka qenë vetëm disa metra larg grabitjes dhe nuk ka reaguar.
“Drejtori i Kufirit në Ministrinë e Brendshme, e ka konfirmuar vetë se policët kanë qenë fare pranë vendit ku ndodhi grabitja, por sipas tij nuk kanë pasur fushëpamje. Pra në fushën e hapur të pistës së avionëve, policët nuk kanë arritur të dallojnë persona me maska dhe të armatosur që grabisin disa thasë me euro dhe ikin pa u hyrë ferrë në këmbë.
Këto rrethana, kalimi i 10 ditëve pa gjetur asnjë autor, ngjarje të rënda të përsëritura në këtë aks që është një nyje strategjike, dëshmojnë rënien e shtetit, rënien e çdo standardi të sigurisë në këto 3 vite”, deklaroi Alibeaj.
Ai theksoi më tej se arsyeja kryesore pse krimi arriti në këtë nivel të paimagjinueshëm, ka të bëjë me;
rënien e ligjit në këto 3 vite,
me sundimin e bandave,
me krimin e veshur me pushtet dhe pushtetin e veshur me krim,
me drogën që ka mbuluar çdo pëllëmbë të vendit,
me trafikun e armëve,
me inkriminimin e pikave kyçe të policisë
me faktin se kriminelë të njohur ulen në zyrën e ministrit të brendshëm për ndërmjetësime private,
me faktin se kriminelë, trafikantë, vrasës e përdhunues me Edi Ramën u bënë deputetë, kryetarë bashkie e shefa të zyrave publike.
“Janë të gjithë këto arsyet pse krimi goditi, sulmoi dhe pushtoi aeroportin e vetëm ndërkombëtar në vend. Janë të gjithë këto arsyet pse Shqipëria, me Edi Ramën, nuk është më një vend i sigurt”, përfundoi Alibeaj.
