Në një kohë që nevojitet vetëm procedura e betimit para Këshillit të Lartë të Drejtësisë për të nisur zyrtarisht punën si gjyqtarë, pesë nga nëntë magjistratët e dekretuar më 23 qershor presin përballjen në Gjykatën Administrative me Presidentin e Republikës dhe KLD¬në. Magjistratët e vitit shkollor 2014 –2015.
Përplasja e magjistratëve, e shumëdiskutuar javën e kaluar, ka në thelb pretendimin e tyre për shkelje të ligjit nga ana e KLD¬së, për emërimin e magjistratëve të vitit 2014¬2015 me short dhe jo në bazë të vlerësimit të tyre.
“Panorama” ka siguruar padinë e plotë të nënshkruar nga pesë magjistratët, e ndryshuar pas dekretimit të emërimeve të tyre nga ana e Presidentit të Republikës, Bujar Nishani.
Përmes saj, magjistratët kërkojnë anulimin dhe konstatimin e pavlefshëm të procedurës së shortit në KLD, të propozimit për emërimin e tyre dhe të dekreteve të Presidentit të Republikës. Paditësit i kërkojnë Administratives si masë sigurimi pezullimin e nëntë dekreteve të Presidentit të Republikës, pasi nga dita në ditë ata presin të bëjnë betimin dhe të nisin ushtrimin e detyrës. Sipas paditësve, në rast se Administrativja pranon padinë e tyre, atëherë vendimet e dhëna prej tyre do të kthehen në nul.
“Duke qenë se jemi në këto kushte urgjence, ku çdo ditë mundet të kushtojë pamundësi në rivendosjen e të drejtave subjektive dhe cenimin e interesave publike nga dhënia e vendimeve gjyqë¬ sore nga gjyqtarë të pacaktuar me ligj, kërkojmë nga gjykata pezullimin e dekreteve të Presidentit të Republikës”, thuhej në padi.
DEMSHPERBLIMI
Përveç pretendimeve për anulim dhe konstatim të pavlefshëm të vendimmarrjeve të KLD¬së dhe dekreteve të Presidentit, pesë magjistratët paditës kërkojnë edhe të dëmshpërblehen nga KLD¬ja dhe Presidenti. Në padinë e tyre, magjistratët pretendojnë se nga veprimet, sipas tyre, në shkelje të ligjit, u kanë shkaktuar dëm moral dhe ekzistencial.
“Detyrimin e Këshillit të Lartë të Drejtësisë dhe Presidentit të Republikës të dëmshpërblejnë solidarisht secilin prej palëve paditëse me shumën 100 lekë për dëmin moral dhe 100 lekë për dëmin ekzistencial të përjetuar nga fakti i paligjshëm”, thuhej në padi.
Magjistratët paditës theksojnë se dëmshpërblimin nuk e synojnë si mjet pasurimi, por vetëm sadisfaksioni moral ndaj situatës së përjetuar nga fakti i paligjshëm i shkaktuar nga të paditurit. Po ashtu, paditësit kërkojnë detyrimin e KLD¬së dhe Presidentit që të paguajnë kamatëvonesat e arrira të çdo vlere të mësipërme dëmshpërblimi, për secilën prej palëve paditëse.
