Personi i armatosur gjatë një shkëmbim zjarri me policinë e Dallasit është shprehur në momentet e fundit të jetës se dëshironte të vriste njerëzit e bardhë, veçanërisht oficerët e policisë, të paktën nga sa bën të ditur shefi rajonal i policisë.
I dyshuari, i identifikuar së fundi nga mediet amerikane si Micah Johnson, 25 vjeç, ka thënë se ka qenë i irrituar nga vrasjet e fundit të njerëzve me ngjyrë nga policia, sipas shefit David Brown.
Plot 5 oficerë policie të Dallasit në Teksas mbetën të vrarë dhe 7 të tjerë u plagosën nga të shtënat e snajperave, gjatë një marshimi kundër vrasjeve të njerëzve me ngjyrë nga duart e policisë. Tashmë në paraburgim janë 3 persona, të cilët po merren në pyetje.
Brown shtoi se i dyshuari është vrarë kur policia përdori eksplozivët e vendosur nga një robot, për t’i dhënë fund një shkëmbim zjarri të gjatë brenda një ndërtese ku ai ishte fshehur. Përpara se të vritej, ai kishte folur me një negociator.
“Ai rrëfeu se ishte irrituar së tepërmi qoftë nga lëvizja protestuese ‘Jetët e njerëzve me ngjyrë vlejnë’, ashtu dhe nga vrasjet e fundit të policisë”, tha shefi i policisë së Dallasit në një konferencë për shtyp. “I dyshuari tha gjithashtu se ishte i mërzitur edhe me njerëzit e bardhë, madje theksoi se donte të vriste disa prej tyre, veçanërisht oficerë policie”.
Brown shtoi se personi në fjalë nuk ishte pjesë e ndonjë grupi terrorist, por se kishte vepruar i vetëm. Gjithsesi, policia kishte thënë më herët se ata besonin se mund të ishte i përfshirë më shumë se një i armatosur gjatë të shtënave.
Micah Johnson vinte nga Mesquite, një rajon periferik lindor i Dallasit, si dhe ishte anëtar i forcave rezervë të ushtrisë amerikane, siç raportojnë mediet amerikane. Të shtënat nisën rreth orës 20:45 me orën lokale të së enjtes, teksa demonstruesit po marshonin përmes qytetit. Një ndienjë paniku mbërtheu të pranishmit, të cilët rendën kush e kush më shpejt të gjenin streha mbrojtjeje. Policia e përshkroi situatën si “të planifikuar dhe të ekzekutuar me kujdes të jashtëzakonshëm”.
Protestat erdhën pas vrasjeve të javës së fundit të Philando Castile në Minnesota, si dhe Alton Sterling në Louisiana. Presidenti Barack Obama, i cili ndodhet në samitin e NATO-s në Poloni, e quajti atë si një “sulm vicioz, të përllogaritur dhe të neveritshëm ndaj forcave ligjzbatuese”.
Prokurorja e Përgjithshme amerikane, Loretta Lynch i përshkroi zhvillet e Dallasit si “një tragjedi e pakuptueshme”. “Amerikanët anembanë vendit janë përshkuar nga ndienjat e pafuqisë, e pasigurisë dhe e frikës”, tha ajo. “Këto ndjenja janë të kuptueshme dhe të justifikueshme, por përgjigjja nuk mund të jetë përmes dhunës”.
