Shqipëria do ta pranojë Britaninë në NATO edhe pse ka dalë nga BE. Këtë ka thënë dje ministrja e Mbrojtjes Mimi Kodheli gjatë një bashkëbisedimi me gazetarët, përpara samitit të NATO –s që do të mbahet në Varshavë.
E gafat e Ministres Kodheli, nuk kanë të sosur. Në tetor 2014, në një intervistë për Zërin e Amerikës, ministrja Kodheli tha se po bashkëpunonte me qeverinë kurde në një kohë që dihet botërisht se kurdët nuk kanë as shtet e as qeveri.
E dje Kodheli u shpreh se pavarësisht se Britania doli nga BE, “ne si NATO e pranojmë në gjirin tonë”, madje duke e nënvizuar, siç mund të shihet në fjalën e zbardhur të ministres në faqen zyrtare të Ministrisë së Mbrojtes, apo në videon e mëposhtme (minuta 30:35 – 31:09).
Nuk dihet se çfarë ka dashur të thotë Ministrja e Mbrojtjes por duket se nuk e di që Britania e Madhe ishte bashkëthemeluese e NATO-s.
Britania e Madhe është anëtare e saj prej 4 prillit të vitit 1949 dhe fuqia e dytë ushtrake e Aleancës së Atlantikut të Veriut. Britania e Madhe është po ashtu një prej kontribuuesve kryesore të NATO-s dhe një anëtar i përhershëm i Këshillit të Sigurimit të OKB, shkruan Lapsi.
Britania e Madhe nuk e ka ndryshuar asnjëherë rolin dhe qëndrimin e saj ndaj NATO-s dhe referendumi i fundit të qershorit ishte për të qëndruar ose jo në BE, pa patur kurrëfarë ndikimi në lidhje me raportin e saj me NATO-n. Britania e Madhe ishte ashtu në ndër vendet kryesore të NATO-s që mbështeti pranimin e Shqipërisë në vitin 2009, pavarësisht se ministrja Kodheli flet sikur Shqipëria ka në dorë të ardhmen e Britanisë në NATO.