Karbohidratet konsiderohen si armiku numër një kur bëhet fjalë për dietat. Aq shumë sa është e vështirë të imagjinosh dikë duke ngrënë një pjatë me makarona ose një copë bukë të bardhë pa u ndjerë i shqetësuar se do të shtojë në peshë. Por, a duhet t’i shmangim apo limitojmë karbohidratet nëse duam të dobësohemi?
Në lidhje me këtë çështje, revista “Healthista” ka intervistuar disa nga ekspertët më të mëdhenj të dietave, të cilët kanë dhënë përgjigje krejtësisht të ndryshme. Më poshtë do të gjeni opinione nga dy ekspertë të dietave.
Aisling Pigott, ekspert i dietave dhe zëdhënës i Shoqatës Britanike të Dietave
Karbohidratet janë demonizuar gjithmonë nga personat që kanë dashur të dobësohen. Në të vërtetë, karbohidratet me përmbajtje niseshteje (patate, oriz, makarona, drithëra, bukë etj) kanë në fakt shumë pak kalori dhe futen tek ushqimet e pasura me vitamina. Këto karbohidrate janë të pasura me fibra dhe kanë shumë pak yndyra. Karbohidratet konvertohen në glukozë që transportohet në të gjithë trupin. Kjo glukozë ruhet së bashku me ujin si glikogjen tek muskujt dhe mëlçia.
Në shumë raste, rënia drastike në peshë ndodh vetëm për shkak të humbjes së ujit në trup, dhe nuk reflektohet asnjë ndryshim real në format e trupit.
Karbohidratet janë një burim i rëndësishëm i energjisë. Energjia e krijuar nga karbohidratet përdoret për funksionimin e organeve, trurit dhe muskujve. Truri jonë nuk mund të funksionojë pa glukozë. Dietat që përmbajnë shumë pak karbohidrate detyrojnë trupin të prodhojë glukozë nga proteinat dhe yndyrat, prandaj ndihemi të lodhur dhe na vjen erë e keqe nga goja.
Karbohidratet luajnë gjithashtu një rol të rëndësishëm në rregullimin e oreksit. Pavarësisht gjithë këtyre përfitime, karbohidratet do t’ju shëndoshin nëse e teproni me to.
Robert Hobson, ekspert i dietave dhe bashkautor i studimit “The Detox Kitchen Bible”
Edhe pse dietat me pak karbohidrate dhe me shumë proteina janë të mira për të rënë në peshë, shumica e njerëzve nuk i ndjekin siç duhet, prandaj fillojnë të shtojnë sërish në peshë.
Karbohidratet janë një nga tre lëndët ushqyese (përfshirë edhe yndyrat dhe proteinat) që sigurojnë energji, dhe nëse e teproni me to, mund të shtoni në peshë. Shumica e ushqimeve përmbajnë lëndë të ndryshme ushqyese, si vitamina, minerale dhe përbërës kimik bimor që balancojnë dietën.
Të thuash se të gjitha karbohidratet të shëndoshin është ta thjeshtëzosh çështjen. Ushqimet e pasura me karbohidrate ekzistojnë në dy forma: komplekse dhe të thjeshta. Të dyja sigurojnë katër kalori për gramë, e njëjta sasi q sigurojnë edhe proteinat dhe gjysma kalorive të yndyrnave.
Karbohidratet komplekse, si tërshëra, drithërat, kungulli, patatet e ëmbla dhe perimet bishtajore, janë të pasura me fibra.
Kjo lëndë ushqyese i bën ato të dobishëm në dietat për të rënë në peshë, duke qenë se marrin shumë kohë për t’u zbërthyer dhe ju mbajnë të ngopur për një kohë të gjatë. Ndërsa karbohidratet e thjeshta, si orizi i bardhë, buka e bardhë, makaronat dhe sheqeri, zbërthehen më shpejtë, prandaj doni të hani sa më shumë për t’u ngopur. Gjithsesi, këto ushqime nuk duhen shikuar si të pashëndetshme, pasi, nëse kombinohen me proteina, yndyra dhe perime, mund të ngadalësojnë zbërthimin e ushqimeve. Këto ushqime janë sidomos të mira për personat që janë shumë aktivë dhe merren me sporte të ndryshme.
Nga eksperienca, mendoj që dieta e pasur me karbohidrate komplekse, proteina dhe yndyra të shëndetshme (ndërkohë që kufizoni ushqimet e përpunuar dhe sheqerin) është ekuacioni më i mirë i ushqimit për të humbur ose mbajtur një peshë normale.
