Dy aksidente të ndodhura në maj në aksin Mbikalimi i Shkozetit – Rrogozhinë nxorrën në pah një skandal me sigurinë rrugore. Në njërin rast, ku humbën jetën dy fëmijë, u zbulua se Autoriteti Rrugor Shqiptar nuk kishte zbatuar një vendim të Gjykatës Administrative të Apelit për të mbyllur një kalim të paligjshëm me mbrojtëset metalike anësore.
Mbrojtësja metalike e ndërprerë u bë shkak për vrasjen e dy fëmijëve. Në rastin e dytë, një aksident me pasojë vdekjen që ndodhi në unazën e Durrësit, pranë mbikalimit të Shkozetit, zbuloi se edhe pse dy firma kishin fituar mbi 30 milionë lekë të reja për mirëmbajtjen e rrugës, nuk kishin vënë mbrojtëset metalike në një kthesë të fortë, duke u bërë kështu shkak për një tjetër aksident me vdekje.
Për rastin e parë u dërguan në burg tre drejtues të ARRSH, që më vonë u liruan nga Apeli. Për të dytin po ndiqet në gjendje të lirë administratori i njërës prej firmave.
Me ardhjen e koalicionit PS – LSI në pushtet ishte vetë ministri i transporteve, Edmond Haxhinasto, që deklaroi 10 fishim të fondeve për rritjen e sigurisë rrugore.
Tre vjet nga qeverisja e PS – LSI, rezulton se fondet e shtuara nuk e kanë rritur aspak sigurinë rrugore.
INSTAT raporton se në tremujorin e parë tëvitit 2016 aksidentet rrugore pësuan një rritje vjetore me mbi 10%.
Të dhënat u publikuan në Buletinin Statistikor. Të dhëna të tjera të publikuara nga revista Monitor tregojnë se fondet për sigurinë rrugore janë rritur në mënyrë të ndjeshme vitin e kaluar, duke arritur në 1.5 miliardë lekë. Në vitin 2009, fondet arrinin në vetëm 100 milionë lekë.
Por ku shkojnë këto para?
Dy aksidentet e ndodhura në maj në aksin Mbikalimi i Shkozetit – Rrogozhinë zbuluan një zinxhir lidhjesh të dyshimta për shpërndarjen e parave për sigurinë rrugore nëpërmjet lidhjeve nepotike.
Njëra nga dy kompanitë që kishte fituar tenderin prej më shumë se 30 milionë lekësht të reja për mirëmbajtjen 1 –vjeçare të kësaj rruge kishte për pronar babain e shefit të kabinetit të ministrit Haxhinasto, i cili mban edhe detyrën e drejtorit të projekteve në Ministrinë e Transporteve.
Mediat hodhën dyshime mbi mënyrën se si u fitua tenderi, po ashtu edhe për mënyrën e përdorimit të fondeve. Vënia nën hetim të administratorit të njërës prej kompanive për aksidentin e dy të ndodhur në aksin Mbikalimi i Shkozetit – Rrogozhinë kishte të bënte pikërisht me faktin se kompania nuk kishte zëvendësuar mbrojtëset prej metali, që ishin të amortizuara dhe jashtë funksionit, ashtu si edhe u tregua nga aksidenti me pasojë vdekjen.
Të dhënat zyrtare tregojnë se në tremujorin e parë të vitit 2016 pati 421 aksidente. Nga këto aksidente humbën jetën 56 persona. INSTAT raporton se numri i viktimave u rrit me 3.8 përqind në këtë tremujor, krahasuar me të njëjtën periudhë të një viti më parë.
Po ashtu u rrit me 3.3 përqind edhe numri i të plagosurve. 500 persona u plagosën në aksidentet rrugore të tremujorit të parë të 2016.
Banka Botërore nxorri si shkak kryesor të aksidenteve planifikimin e rrugëve. Për këtë arsye BB nënshkroi me qeverinë shqiptare një marrëveshje huaje prej 65.9 milionë eurosh. Qeveria shqiptare ka planifikuar të shpenzojë 41.2 milionë euro, që do të shpenzohen nga Ministria e Transportit dhe Autoriteti Rrugor Shqiptar deri në vitin 2021.
Mirëmbatja e rrugëve do të zhvillohet sërish nëpërmjet procesit të tenderimit, tendera që do të shpërndahen sërish nga Ministria e Transporteve dhe ARRSH, për të cilat media ka hedhur dyshime se në rastin e tenderit të mirëmbajtjes së aksit Mbikalimi i Shkozetit – Rrogozhinë, kanë favorizuar kompaninë e babait të shefit të kabinetit të ministrit. /Lapsi.al
