Deputeti i LSI, Luan Rama ka reaguar ashpër lidhur me grabitjen e 1 milion euro në Rinas duke akuzuar sigurinë në aeroport.
Ai ka folur në Komisionin e Sigurisë ku diskutohet grabitja në Aeroportin e Rinasit, e cila ka tronditur vendin, pasi ndodhi në një kohë kur masat e sigurisë ishin shumëfishuar. “Siguria në Rinas është zero, ngjarje të tilla nuk kanë ndodhur as në vitin 1997. Nuk ka rëndësi shumë e vjedhur, por fakti që në Rinas hyri grupi i armatosur. Është shkelur siguria kombëtare dhe vija e kufirit. Duhet të kërkojmë llogari për masat e marra pas ngjarjeve në Stamboll”, tha deputeti i LSI, Rama duke e krahasuar grabitjen me ngjarjet e 1997.
Më tej ai i ka bërë thirrje Presidentit të Republikës që të reagojë. Ndërsa deputeti socialist Paulin Sterkaj u shpreh se duhet lënë ë hetimet për të zbardhur ngjarjen. “Duhet të lëmë hetimet të flasin vetë. Kam bindjen se grupi që grabiti s’ka qenë grup i armatosur, por marrëveshje midis individëve me pozicione te ndryshme”, tha ai. Deputeti Asllan Dogjani tha se është cenuar rende siguria kombëtare, dhe se duhet te ishte ne raportim ministri i Brendshëm. “Makina e cila u përdor nga grabitësit mund të ishte me eksploziv, duhet të merreshin masa për një mbledhje te jashtëzakonshme për sigurinë kombëtare”, tha ai.
