Grabitja e ndodhur në Rinas pak ditë më parë ka bërë që ish-ministri i Drejtësisë, Nasip Naço të padisë në gjykatë një portal online i cili ka shkruar se kompania private e sigurisë fizike, është nën pronësinë e vëllait të Naços.
Ish-ministri shprehet se do të kërkojë 250 milionë lekë nga faqja online “Pamfleti” që drejtohet nga Gjergj Zefi, një ish-gazetar i viteve 1990, i rikthyer me një portal.
Me anë të një reagimi publik, Naço shprehet se “jam i detyruar të sqaroj një lajm krejtësisht të pavërtetë të publikuar sot në një nga mediat e shumta online. Faqja Pamfleti lidh kompaninë e sigurimit “Nazer 2000”, që kishte në përgjegjësi ruajtjen e aeroportit “Nënë Tereza” dhe transportin e parave gjatë grabitjes së dy ditëve më parë me vëllain tim, i cili cilësohet si bashkëortak i saj kompanie, por edhe me emrin tim dhe subjektin ku unë aderoj politikisht”.
“Në fakt kjo është krejtësisht e pavërtetë. Kompania “Nazer 2000” ka si administrator dhe aksioner të vetëm zotin Durim Nazeraj, ndërsa drejtues teknik zotërinjtë Mehmet Bazaj dhe Alfred Zylalaj dhe kjo është lehtësisht e provuar, mjafton të klikosh në QKR për të parë historikun e kësaj kompanie”, shkruan Naço në reagimin e tij publik në lidhje me artikullin e botuar.
Sipas ish-ministrit të Drejtësisë, “lufta e klikimeve për të bërë skupin e radhës i ka shtyrë “drejtuesit” e këtij portali të shpifin në mënyrë banale dhe të heqin vëmendjen nga çështja konkrete, duke dizinformuar publikun për zbulimin e së vërtetës, duke u shërbyer me përkushtim autorëve të vërtet të grabitjes”.
“Nuk besoj së përmendja e emrit tim do e quaj problemin të zgjidhur dhe Presidenti i Republikës të mos e mbledhë Këshillin e Sigurisë Kombëtare për këtë ngjarje kaq të rëndë. Unë mbështes dhe inkurajojë organin e Prokurorisë së Përgjithshme për të kryer hetime të gjithanshme dhe me profesionalizëm.
Drejtuesit e këtij “Pamfleti” me përmendjen e emrit tim nuk mund të rriten politikisht dhe ekonomikisht, pasi kam kontraktuar avokatët e mi dhe do të bëj kallëzim për ndjekje penale, por do të kërkoj në gjykatë edhe dëmin moral në shumën 250 milion lekë!”, – thuhet në reagimin e ish-ministrit të Drejtësisë, Nasip Naço.
