Partia Demokratike akuzon se në grabitjen e dy ditëve më parë në aeroportin e Rinasit janë të përfshirë edhe zyrtarë të lartë të policisë, por ky fakt po mbahet i fshehtë nga ministri i Punëve të Brendshme Saimir Tahiri dhe kryeministri Edi Rama.
Kreu i Departamentit të Rendit dhe Sigurisë, Enkelejd Alibeaj tha në një deklaratë për mediat se po fshihen fakte që dëshmojnë se policia është njoftuar nga autoritetet e Aeroportit brenda 1 minuti dhe jo pas 10 minutave siç deklaroi dje drejtori i Policisë së Tiranës, Ervin Hodaj.
“Përgjigja ka qenë se Furgoni i Policisë ndodhet në pistë për të pritur dhe shoqëruar persona të deportuar. Edhe pse një furgon i grupit të gatshëm gjendej aty i dislokuar, pas sulmeve të Stambollit, Policia ka arritur në vendngjarje vetëm pas 30 minutash. Dy akset e vetme nga mund të ikin grabitësit, ai nga Rinasi në Tiranë dhe Rinas-Fushe Krujë, nuk u bllokuan nga Policia në kohën e duhur”, tha Alibeaj.
Një tjetër fakt i fortë që paraqiti Alibeaj, është se shuma e grabitur nuk është rreth 1 milionë euro siç u tha zyrtarisht nga policia, por sipas tij flitet për një shumë rreth 10 milionë euro. Këtë informacion, PD thotë se e ka marrë nga “burime serioze pranë bankave të nivelit të dytë”.
“Të gjitha këto rrethana tregojnë dhe një herë fuqinë që ka marrë krimi me Ramën e Tahirin, dhe dëshmojnë inkriminim të pikave kyçe të policisë. Partia Demokratike i bën thirrje Prokurorisë të hetojë me intensitet të gjithë rrethanat e dyshimta e të nxjerrë përgjegjesitë nga i pari tek i fundit, për grabitjen e armatosur të Aeroportit të Rinasit që është një prej goditjeve më të mëdha të sigurisë publike dhe sigurisë kombëtare në vend”, përfundoi ai.
