Ish-deputeti Mark Frroku ka deklaruar sot gjatë procesit gjyqësor se “nuk jam alien si më përshkruan prokurori” dhe “sëbashku me familjen kemi punuar me ndershmëri.
Jam i pafajshëm, nuk kam lidhje me vrasjen” tha ai, duke e pasur fjalën për atë që akuzohet: Vrasjen me paramendim në Belgjikë në 1999 të një shqiptari, pastrimin e parave, mosdeklarimin e pasurisë.
Avokati i tij paraqiti sot prova të reja për çështjen, por në seancë ishte i pranishëm edhe vetë Frroku që theksoi se akuzat ndaj tij janë “tendencioze, brutale dhe politike”.
Po ashtu, ish-deputeti ka hequr dorë nga gjykimi i shkurtuar pasi avokati i tij Tonin Prendi kërkoi të hidheshin poshtë një sërë aktesh të dosjes së paraqitur për gjykim nga Prokuroria, si psh një akt- ekspertimi kontabël të pasurisë së ish-deputetit.
Sipas tij, ekspertja që ka bërë akt-ekspertimin ka qenë e njëanshme, pasi ishte inspektore në ILDKPI dhe se gjatë përpilimit të akt-ekspertimit nuk kishte marrë parasysh disa biznese të regjistruara të familjes Frroku.
