Gjykata e Apelit ka zbardhur ditën e sotme vendimin se pse e riktheu në detyrë drejtorin e Policisë së Shtetit, Haki Çako.
Gjykata e Apelit çmon se nuk ekzistojnë kushtet, që Haki Çako, të prishë, rrezikojë provat, të largohet nga vendi, apo të kryejë një krim më të rëndë, apo të njëjtë me atë që akuzohet. Për Apelin, pretendimet se Çako mund të ndikojë tek vartësit e tij dhe për pasojë tek hetimi, nuk qëndron.
Sipas vendimit të Apelit, pezullimi i Çakos ka qenë i parregullt, pasi nuk janë vlerësuar në mënyrë të drejtë rrethanat dhe kushtet ligjore.
Gjithashtu, gjykata e çmon si të pabazuar pezullimin e Çakos, pasi nuk rezulton që nga ana e tij të jetë vepruar duke vënë në rrezik marrjen apo vërtetësinë e provës. Për të gjitha këto arsye, togat e zeza vendosën të rrëzojnë vendimin e Shkallës së Parë dhe të rikthejnë në detyrë Çakon.
