Guvernatori i Bankës së Shqipërisë, Genti Sejko, tha se hezitimi i bankave për të kredituar ekonominë kërcënon rritjen ekonomike. Në forumin e përbashkët financiar të organizuar nga BSH dhe Fondi Monetar Ndërkombëtar, Sejko tha se arsyeja kryesore që kredia nuk rritet është oferta e shtrënguar e bankave, e cila mund të ketë pasoja të rënda për ekonominë.
“Nëse nuk do të përmirësohet, oferta e dobët për kredi nga bankat mund të vërë në rrezik rritjen e kredisë dhe rimëkëmbjen e ekonomisë,” – tha Sejko.
Kreu i Bankës Qëndrore i bëri thirrje bankave private që të tregohen më aktive në mbështetjen e ekonomisë.
“Bankat private duhet të bëhen më largpamëse dhe fleksibël në politikat e kredive. Ne ju bëjmë thirrje të promovoni Shqipërinë në grupet tuaja bankare. Ne e dimë, që ka një perceptim risku më negativ se sa realiteti për Shqipërinë. Kjo dëmton vendin sepse shumica e vendimeve për kreditë e mëdha merren në bankat mëma,” tha Sejko.
