Një atentat me eksploziv i është bërë një efektivi të Komisariatit të Policisë Mirditë.
Mësohet se shpërthimi ka ndodhur mëngjesin e djeshëm rreth orës 5:15 në fshatin Bardhaj të Mirditës. Fatmirësisht nuk ka persona të lënduar,.
Sipas informacioneve zyrtare një sasi lënde plasëse është vendosur në automjetin e policit me iniciale A.D., 50-vjeç nga persona ende të paidentifikuar. Për pasojë është dëmtuar xhami i përparmë dhe pjesa e brendshme e mjetit.
Ndërkaq, uniformat blu kanë nisur hetimet dhe po punojnë për identifikimin dhe kapjen e autorëve. Dyshohet se atentati ka lidhje me detyrën e 50-vjeçarit.
Materialet u referuan Prokurorisë së Rrethit Gjyqësor Lezhë për veprën penale “Shkatërrim prone me eksploziv”.
