Kompania e veshmbathjeve ‘Puma’ ka reaguar pas skandalit me grisjen e fanellave të Zvicrës.
Në ndeshjen Francë – Zvicër, disa lojtarëve të përfaqësueses helvetike u janë shqyer gjatë ndeshjes fanellat, duke bërë që kjo të jetë një temë e nxehtë, e ku kritika ndaj ‘Puma’ shfaqi edhe Xherdan Shaqiri.
“Ne menjëherë filluam të hetojmë arsyen pse janë shqyer fanellat e Zvicrës. Shqetësimi kryesor i Puma është se gjithmonë duam të sjellim standard të lartë të cilësisë. Ne marrim pjesë në Euro 2016 edhe me fanellat e Austrisë, Çekisë, Italisë dhe Sllovakisë, por federatat e atyre vendeve na kanë konfirmuar se nuk kanë pasur ndonjëherë problem me fanellat”, thuhet në komunikatën e lëshuar.
“Në një analizë paraprake në fanellën e Zvicrës, ka pasur një pjesë të materialit ku janë dëmtuar fijet gjatë prodhimit, duke çuar në dobësimin e fanellave. Ky material i dëmtuar është përdoruar vetëm te një numër i kufizuar i fanellave të Zvicrës. Kemi verifikuar të gjithë inventarin dhe mund të sigurojmë se kjo nuk do të ndodh më. Kërkojmë ndjesë nga lojtarët zvicerane dhe federata e tyre”.
