Sonte në orën 21:00 Shqipëria do të luaj ndeshjen e fundit në fazën e grupeve, ku kundërshtar do të ketë Rumaninë e cila po ashtu po lufton për vendin e tretë.
Tre pikë mund të jenë të mjaftueshme që Shqipëria të kualifikohet tutje për në evropian, pasi sipas disa prognozave mundësia për t’u kualifikuar me tre pikë është mjaft e madhe.
Por, dilema e përzgjedhësit të Kombëtares, De Biasi është te formacioni i sotëm, i cili pritet të jetë më ofensiv pasi Shqipëria nuk ka çfarë të humbas në këtë takim.
E rëndësishme për Kombëtaren është rikthimi i kapitenit Lorik Cana, por edhe ky është në dilemë të madhe nëse do ta nisë nga minuta e parë pas paraqitjes dinjitoze të Arlind Ajetit në ndeshjen ndaj Francës.
Sadiku apo Cikalleshi kjo është një tjetër dilemë për trajnerin italian, i cili kishte lojtarin favorit Sokol Cikalleshin gjatë gjithë kualifikimeve për në këtë evropian, kurse Sadiku dështoi të shënonte në dy ndeshjet e para edhe pse tregoi formë të shkëlqyer.
