Kapet vrasësi i biznesmenit Leonard Murataj, ish-anëtar i bandës së Lulzim Berishës. Sipas policisë është arrestuar 22-vjeçari Bedri Haka, nga Kruja i cili akuzohet se më 18 nëntor të vitit 2014 ka ekzekutuar 51-vjeçarin Murataj në qendër të qytetit të Durrësit.
Gjykata e Rrethit Gjyqësor Durrës me Vendimin Penal Nr.1014, datë 23.11.2014, ka dhënë masën e sigurisë “Arrest me burg” për veprat penale “Vrasja me paramendim” dhe “Prodhim dhe mbajtje pa leje të armëve dhe municioneve luftarake” për 22-vjeçarin Haka.
Murataj ka qenë person me precedent penalë të mëparshëm në fushën e veprave penale kundër jetës.
Ish- anëtari i bandës së Lulzim Berishës, u ekzekutua më 18 nëntor përpara lokalit në pronësi të tij, pranë sheshit “Liria” në Durrës.
Grupi hetimor ka mundur të zbardhë mekanizmin e vrasjes pas mbledhjes së dëshmive në vendngjarje. Sipas tyre Leonard Murataj ka qenë duke pirë kafe në lokalin e tij kur dy persona e njoftuan të dilte jashtë. “I thuaj pak Nardit të dalë jashtë se e kërkon Beni”, mësohet t’i ketë thënë njëri prej autorëve kamerierit të lokalit. Ky i fundit ia çoi fjalët Muratajt, i cili nuk hezitoi të dilte. A
i u përball me dy personat vetëm pak metra larg lokalit me të cilët debatoi për rreth 10 sekonda. Sipas dëshmitarëve pas debatit, i cili zgjati pak sekonda, njëri prej personave nxori pistoletën nga xhupi dhe qëlloi gjashtë herë në drejtim të Muratajt i cili ra në tokë i gjakosur. Dy plumba e kapën atë në kokë dhe tre të tjerë në trup, duke i shkaktuar vdekjen e menjëhershme.
Pas krimit, autorët janë parë të largohen me shpejtësi drejt bulevardit kryesor të qytetit të Durrësit. Ata kanë ecur në këmbë për disa metra dhe më pas u larguan me një veturë me targa të Fushë-Krujës e cila i priste disa metra larg. Mjeti u gjet një ditë më pas i braktisur në Vorë, ku sipas dëshmitarëve ishte pikërisht ai që përdorën autorët.
Sipas policisë, Leonard Murataj, i njohur si kundërshtar i Lulzim Berishës, është arrestuar më 8 janar 2006 në Durrës, ndërsa u hetua në gjendje të lirë shoku i tij, Erald Bajramaj. Murataj akuzohej për pengmarrjen e Artan Ilmiut dhe vrasjen e babait të tij, Nuhiut, në vitin 1999. Gjykata e Krimeve të Rënda vendosi, që aktet e dosjes në ngarkim të Muratit t’ia rikthente prokurorisë për rihetim. Për shkak të përfundimit të afateve të paraburgimit, prokuroria u detyrua ta lironte të pandehurin Murati dhe hetimet e mëtejshme ndaj tij, të zhvillohen në gjendje të lirë.
