Belgjika shfryn dufin ndaj Irlandës duke mundur ishullorët me rezultatin 3:0 në një ndeshje pa shumë emocione. Irlandezët arritën të rezistonin në 45 minutat e para por sapo filloi pjesa e dytë belgët shpërthyen duke mos e rrezikuar në asnjë moment fitoren. Lojtari i ndeshjes ishte padyshim Romelu Lukaku me dy golat e tij, por mesfusha ishte ajo që i dha fitoren Belgjikës duke iu kundërpërgjigjur kështu, kritikave të shumta që mori ekipi pas ndeshjes me Italinë.
Pjesa I
Belgjika është ekipi që duhet të tregojë se sa vlen, pas dështimit kundër Italisë. Ndeshja fillon me një belgjikë dominuese e cila kontrollon ndeshjen dhe arrin të krijojë sulme të rrezikshme drejt portës së Irlandës por pa sukses. Nga ana tjetër irlandezët janë rreshtuar mirë në mbrojtje dhe mundohen të shfrytëzojnë kundërsulmin por pa sukses në pjesën e parë. Belgët nuk arrijnë ta zhbllokojnë rezultatin por janë ekipi më superior.
Pjesa II
Belgjika duket se e ka rritur presionin ndaj Irlandës dhe kërkon golin me çdo kusht. I cili nuk vonon, është Romelu Lukaku ai që kalon belgët në avantazh në minutën e 48-të pas një pasimi të bukur të De Bruyne. Tashmë belgët do të mund të kontrollojnë ndeshjen me qetësi në kërkim të golit të dytë. Dhe ai vjen shpejt. Këtë herë është mesfushori Alex Witsel i cili pozicionohet mirë në zonë dhe godet me kokë një kros të bukur nga Meunier në minutën e 61-të. Duket se ]do gjë ka mbaruar para kohe për irlandezët, teksa minutat kalojnë dhe ata duken të pafuqishëm për të ndryshuar fatin e takimit. Por Belgjika qenka e inatosur dhe e pangopur. është sërish Lukaku ai që shënon në minutën e 71-të duke fundosur akoma më shumë irlandezët e pashpresë. Kaq mjafton për Belgjikën, të cilët mund ta presin me qetësi ndeshjen e radhës kundër Suedisë.