Prodhuesi ikonik i motoçikletave, Harley-Davidson, është i njohur për motoçikletat me hapësirë të madhe për shoferët dhe motorë gjigantë. Por së shpejti diçka më ndryshe do të vijë nga kompania amerikane.
Në një intervistë për “Milwaukee Business Journal”, zëvendëspresidenti i kompanisë, Sean Cummings, ka thënë se motoçikletat tërësisht elektrike do të vijnë për pesë vjet.
Kompania e njohur më 2014 kishte lansuar një numër të limituar të prototipave elektrikë “LiveWire”, por ato ishin vetëm për testime dhe jo për shitje.
“LiveWire” ishte impresiv për kohën e tij duke arritur përshpejtimin prej 0 në 100 kilometra për orë për më pak se katër sekonda dhe top shpejtësi prej 160 kilometrave për orë.
Pas pritjeve të mira që iu bënë, Harley pritet që të përdorë motorët e ngjashëm edhe në projektin e ri.
Akoma nuk dihen specifikat, pamja dhe forma e motoçikletave elektrike të Harleyt, por sipas raportimit kompania po synon të kapë blerësit e rinj.
