Gjatë paradites, kreu i PD-së, Lulzim Basha ka pritur në takime ambasadorin britanik, atë francez, ambasadorin belg dhe përfaqësuesin hungarez për t’u sqaruar pozicionin e opozitës në lidhje me draftin e reformës në drejtësi.
Më pas takimet do të vijojnë me ambasadorin italian e po ashtu edhe gjatë ditës së nesërme me përfaqësues të tjerë të selive diplomatike të vendeve të BE në Tiranë.
Në të gjitha takimet, lapsi.al mëson se Basha u ka shpjeguar diplomatëve se me votimin me 2/3 të institucioneve që do të dalin nga reforma në drejtësi, Rama arrin të marrë kontrollin mbi sistemin.
Kjo për shkak të mekanizmit zhbllokues, pasi në rast se anëtarët e institucioneve nuk votohen me 2/3, përzgjedhja e tyre bëhet sipas një vlerësimi të një komisioni të posaçëm, i kontrolluar nga mazhoranca. Për këtë arsye Basha thotë se opozita i qëndron variantit të vendeve të rezervuara, pasi garantojnë moskapjen e sistemit të drejtësisë, ashtu sic është shprehur edhe Komisioni i Venecias.
Takimet e Bashës me ambasadorët e vendeve të BE vijnë në një kohë kur Rama i ka vënë përballë opozitës qëndrimet e ambasadës së SHBA dhe të BE. Përsa i përket ambasadores së BE, Romana Vlahutin, opozita konsideron se ajo është e pozicionuar politikisht në krah të mazhorancës.
