Nga Europianët dhe Botërorët, në të cilët parashikimin e rezultateve ua kishim lënë kafshëve, “Euro 2016” është revolucionarizuar dhe deri më sot, nuk kemi pasur raste si ai i oktapodit Pol, elefantit Neli apo pinguinit Ronald, që të zgjedhë se cila skuadër do ta fitojë ndeshjen e radhës.
Në Francë është përfshirë më tepër shkenca dhe të dhënat që ajo ofron. Dhe sipas saj: “Euro 2016 do të fitohet nga Gjermania. Dhe në finale ajo do të përballet me Spanjën”.
Ky është parashikimi që bën “Bing”, motori i kërkimi të gjigantit “Microsoft”, nëpërmjet përpunimit të të dhënave. Në përpunimin e të dhënave, “Bing”, mbështetet edhe tek një model statistikor që vlerëson forcën e skuadrës, marzhin e fitores, apo edhe ndikimet që ka vendi ku luhet ndeshja, përfshirë këtu edhe kushtet meteorologjike.
Ai parashikoi me sukses, se ndeshjen hapëse të këtij turneu (Francë-Rumani) do ta fitonin organizatorët me një gol diferencë. Parashikimi përmes “Bing”-ut është testuar me sukses edhe në 15 nga 16 ndeshjet eliminatore të Kupës së fundit të Botës, por edhe në sportin e tenisit, gjatë “Uimbëlldon 2015”, me një saktësi mbi 70%.
