Sipas sulmuesit të Francës, shënuesit të golit të parë në ndeshjen çelëse të Kampionatit Europian, përballë Rumanisë, fakti që Lorik Cana është i pezulluar për ndeshjen që blutë do të zhvillojnë ndaj Shqipërisë, nuk është lajm i keq.
Bomberi i Francës u shpreh i kënaqur që të mërkurën do të përballet me Kuqezinjtë në mungesë të kapitenit Lorik Cana, pas skualifikimit të këtij të fundit me karton të kuq gjatë pjesës së parë të ndeshjes mes Shqipërisë dhe Zvicrës, e përfunduar me fitoren minimale të helvetëve 0-1. I ndëshkuar me karton të kuq ndaj Zvicrës, Cana nuk do të luajë të mërkurën ndaj Francës.
Kur ende nuk kishte përfunduar ndeshja mes Shqipërisë dhe Zvicrës, Olivier Giroud, i cili po e ndiqte atë, para se të dilte në konferencë për mediat, foli në lidhje me skualifikimin e Lorik Canës, i cili nuk do t’i lejojë atij të luajë të mërkurën në Marseille ndaj Francës. “Nuk është një lajm i keq”, u shpreh sulmuesi i Francës, i cili gjithashtu rikujton humbjen e pësuar në “Elbasan Arena” në qershor të vitit 2015. Mungesa e Canës është konsideruar si lajm i mirë nga sulmuesi i Francës, Oliver Giroud.
“Asaj kohe ne nuk realizuam ndeshjen tonë më të mirë, kjo është e sigurtë. Më shumë se cilësi apo karakteristika të veçanta, ata shfaqën gjenerozitet. Arritën të më ndalin mua. Ata treguan shumë zemër dhe shpenzuan mjaft energji. Është si një revash i vogël. Shqipëria është një ekip që duhet respektuar, si çdo ekip tjetër. Por, kësaj here do të jetë një ndeshje krejt ndryshe. Ne duam ta fitojmë atë me çdo kusht”, deklaroi sulmuesi i Francës, Oliver Giroud.
