Tifozët shqiptarë nga të katër anët e botës, edhe nga Australia e largët, kanë filluar të mbërrijnë aty, për të qenë të shumtë në stadium, për të përkrahur fuqishëm kombëtaren, e cila ka lumturuar dhe bërë krenar një komb të tërë me këtë kualifikim historik.
Shqipëria sot do të zhvillojë përballjen historike në paraqitjen e parë në një kampionat evropian, ndaj Zvicrës e cila fillon në orën 15.00. Rrugët e qytetit të Lensit janë stërmbushur me tifozët kuq e zi, para super përballjes me Zvicrën.
Ata shpresojnë te një rezultat pozitiv në ndeshjen e parë, me qëllim që të vazhdojnë të shpresojnë, ta mbajnë gjallë këtë ëndërr të bukur sa më gjatë të jetë e mundur. Ndeshja Shqipëri-Zvicër do të luhet në Stade Bollaert-Delelis, i cili ka kapacitet prej 38.000 vendesh, ndërsa stadiumi pritet të stërmbushet nga tifozët e shumtë shqiptarë të cilët kanë udhëtuar në Francë.
