Sopranoja shqiptare, Ermonela Jaho është zgjedhur imazhi i muajit korrik në revistën lider, “Opera Magazine”.
“Engjëlli i zjarrtë” siç e quan “The Economist”, revista britanike ka përzgjedhur sopranon shqiptare në kopertinën e muajit korrik, si një nga emrat më të shkëlqyer të operistikes botërore.
Vetëm dy javë më parë, Ermonela do të drithëronte zemrat e shqiptarëve, duke u ngjitur në skenën londineze për të tërhequr çmimin si sopranoja më e mirë në botë, e zgjedhur përmes votave të publikut. Në një ceremoni gala në The Savoy Theatre në Londër, ajo u shpall fituese e International Opera Aëards, e nominuar në kategorinë Reader’s Aëard.
Ajo u kandidua për këtë çmim nga juria e International Opera Aëards, me kryetar John Allison, kryeredaktor i “Opera Magazine” dhe kritik i muzikës klasike në “The Daily Telegraph”. Votimi i publikut nga mbarë bota u zhvillua online. Pasi ka tërhequr trofeun dhe ka falënderuar gjithë ata që e kanë votuar, Ermonela Jaho ka kënduar “Un bel di” nga “Madamma Butterfly”, e shoqëruar në piano nga Roger Vignoles. “Heshtje totale kur këndon Ermonela Jaho”, shkruan IOA. E më pas, ovacione. Duartrokitje të forta, që pasohen nga një tjetër interpretim i veçantë i aries “Mamma usciva da casa” nga opera e kompozitorit italian Ruggero Leoncavallo, “Zaza”.
Një interpretim, që, siç njofton International Opera Aëards, ka mallëngjyer spektatorin në sallë. Ndërkaq Ermonela Jaho vazhdon ngjitjen e saj. Sot ajo do të jetë në një koncert të titulluar “Les grand voiz”, ku do të këndojë në krah të tenorit amerikan Charles Castronovo në Theeatre des Champs Elysees, në Paris.
