Të paktën shtatë civilë janë vrarë, ndërsa 30 të tjerë janë plagosur gjatë një sërë sulmesh ajrore të avionëve të ushtrisë ruse në vendbanimet e provincës veriperëndimore siriane Idlib, që kontrollohet nga forcat e opozitës siriane, raporton sot Anadolu Agency.
Nga Mbrojtja Civile në Idlib, bëhet e ditur se forcat ajrore ruse, dje, në orët e pasdites, filluan sulme të ashpra në zonat e banuara të Idlibit, ndërsa shënjestër e sulmit ishte tregu, xhamia dhe një hotel.
“Një numër i madh i objekteve janë shkatërruar, ndërsa ekipet e shpëtimit tentuan të shuajnë zjarret që shpërthyen pas sulmeve ajrore. Bilanci i viktimave mund të jetë shumë më i madh kur ekipet e shpëtimit arrijnë deri te të gjitha objektet e shembura”, deklaroi për AA, një anëtar i Mbrojtjes Civile, Leys Firas.
Lufta në Siri filloi në vitin 2011 kur regjimi i presidentit Bashar al-Asad tentoi me dhunë të shtyp protestat prodemokratike.
Sipas të dhënave të Observatorit për të Drejta të Njeriut, deri më tani, së paku 470.000 persona kanë humbur jetën gjatë luftës.