Kryeprokurori Adriatik Llalla priti në një takim zyrtar me Ambasadorin e Republikës së Italisë në Shqipëri, z. Alberto Cutillo ku diskutuan për bashkëpunimin e ngushtë mes autoriteteve shqiptare dhe italiane në hetimet e përbashkëta.
Gjatë bisedës Llalla i siguroi ambasadorit italian se institucioni që ai drejton nuk ka në zhvillim asnjë hetim mbi veprimet e Policisë Italiane, pra as në hetimin që Prokuroria e Tiranës po zhvillon këto kohë lidhur me ekzistencën e një pajisje të dyshuar përgjuese.
Biseda u fokusua në forcimin e bashkëpunimit ndërmjet strukturave ligjzbatuese në të dy vendet.
Në takim u vlerësua bashkëpunimi shumë i ngushtë, efiçent dhe i suksesshëm ndërmjet autoriteteve shqiptare dhe italiane, në drejtim të hetimeve të përbashkëta në luftën kundër krimit të organizuar, si edhe rolin tepër koordinues të Ambasadës italiane në Tiranë në veprimet konkrete.
Për më tepër, Prokurori i Përgjithshëm vlerësoi rolin e forcave të sigurisë italiane në shkëmbimin e informacionit me autoritetet shqiptare për evidentimin, zbulimin dhe vendosjen para drejtësisë të personave të përfshirë në veprimtari të ndryshme kriminale në të dy vendet tona.
