Prokurori i Përgjithshëm, Adriatik Llalla ka pezulluar nga detyra prokurorin e Lezhës, Gjergj Rudi pas kallëzimit ndaj tij për rastin e lirimit të shtetasit kosovar, Shuaip Zukaj.
Sipas buirmeve nga Prokuroria, Rudi është pezulluar deri në përfundim të hetimeve për këtë çështje.
Po kështu mësohet se pezullimi i prokurorit të Lezhës ka ardhur pas kallëzimit të ish-juristit të burgut. Aktualisht janë ndaluar nga policia për këtë ngjarje përgjegjësi i sigurisë i burgut të Shënkollit si dhe juristi. Ndërkohë që u shkarkua Drejtori dhe 3 inspektorë.
Shuaip Zukaj, u lirua pasi kishte mbaruar dënimin e marrë në Shqipëri, në lidhje me akuzën e plagosjes së një shtetasi nga Kosova në vitin 2000, në Shëngjin.
Por, në dosjen e tij personale ndodhej vendimi i formës së prerë, dhënë nga Gjykata në Shqipëri, që me përfundimin e dënimit, ai duhej të ekstradohej në Kosovë, ku ishte dënuar me 20 vjet burg për vrasjen në vitin 2011, të Zyber Derishajt dhe plagosjen e Adil Thaçit.
