Kreu i shtetit Bujar Nishani i ka bërë thirrje qeverisë që nëse lind nevoja, të garantojë ndihmën e specializuar jashtë vendit për të plagosurit që janë më rëndë në QSUT.
Ai ka ndarë dhimbje për ngjarjen tragjike të djegies së autobusit me besimtarë në Krujë duke uruar njëkohësisht shërimin e të lënduarve.
Po ashtu, Nishani i drejton edhe një apel Prokurorisë për të zbardhur shkaqet e këtij incidenti në autobusin me të cilin besimtarët ishin nisur për pelegrinazh.
Kreu i Shtetit, krahas shqetësimit për ngjarjen e rëndë, shpreh urimet për një shërim sa më të shpejtë të të lënduarve të shumtë, duke i bërë njëkohësisht thirrje Qeverisë dhe institucioneve përkatëse e përgjegjëse që të ofrojnë ndihmë të specializuar jashtë vendit, nëse është e nevojshme.
Presidenti Nishani kërkon gjithashtu nga Prokuroria dhe organet e ligjzbatuese të hetojnë ngjarjen e rëndë me pasoja fatale për pelegrinët e aksidentuar, në mënyrë që të dalë në dritë e vërteta dhe të zbulohen shkaqet e vërteta të kësaj tragjedie.
