Ministri i Mirëqenies Sociale dhe Rinisë Blendi Klosi ka bërë të ditur se brenda këtij viti pritet të mbyllen qendrat rezidenciale të fëmijëve.
Klosi tha se fëmijëve do tu gjenden familje kujdestare, dhe ky proces do të merret përsipër nga bashkitë e vendit.
Këto Rezidenca të fëmijëve jetimë por edhe të atyre fëmijëve, prindërit e të cilëve nuk kanë mundësi financiare për tu mbajtur, do të kthehen në qendra ditore ku fëmijët të qëndrojnë sapo t’i gjendet një familje kujdestare.
Gjatë takimit me kryetarët e bashkive të vendit, ministri Klosi tha se nëse do të ketë fëmijë që nuk i është gjetur ende familje kujdestare, qendrat do të vijojnë të mbahen hapur. Ai saktësoi se vetëm disa qendra të caktuara do të jenë hapur për fëmijët që do të merren në kujdestari nga shteti. Ky propozim u mirëprit edhe nga kryetarët e bashkive të pranishëm në takim, por u ngrit nevoja për më shumë fonde.
Ky propozim vjen pas skandalit që shpërtheu në qendrën Rezidenciale të Fëmijëve në Shkodër, ku tre vajza të mitura u abuzuan seksualisht ndërsa fëmijët e tjerë shfrytëzohen për punë të rënda brenda qendrës. Këto qendra duket se nuk do të jenë më streha e tyre, por për ta do të mendohet të gjendet familje kujdestare.
