Ministri i Drejtësisë Ylli Manjani ka reaguar pas arrestimit të kancelares së Gjykatës së Apelit në Durrës, e cila ndodhej në këtë detyrë prej 10 vjetësh.
Manjani përgëzon Prokurorinë, ndërsa e inkurajon të hetojë çështjen në mënyrë të plotë.
“Përshëndes aktin e prokurorisë dhe e mbështes në veprimet që zbardhin të vërtetën. E inkurajoj për hetime të thella e të plota të këtij rasti”, ka deklaruar Manjani.
Ekzekutimi i urdhër-arrestit ndaj kancelares së Apelit Durrës, Suzana Mandia është bërë në bazë të një hetimi disamujor me metoda speciale nga ana e Drejtorisë për hetimin e krimit ekonomik dhe financiar, në bashkëpunim me Prokurorinë e Krimeve të Rënda në Tiranë, përmes të cilit është bërë e mundur dokumentimi i veprimtarisë korruptive, të shtetases së mësipërme.
