Presidenti i Republikës Bujar Nishani i ka kërkuar publikisht Prokurorisë së Përgjithshme të hetojë si ka mundut të futet në Shqipëri pajisja ilegale përgjuese e Policisë së Shtetit dhe të nxirren para ligjit personat përgjegjës.
Duke folur në aktivitetin për 25-vjetorin e Shoqatës së të Burgosurve dhe Përndjekurve Politikë të Shqipërisë, kreu i shtetit shqiptar e cilësoi këtë ngjarje tepër të rëndë pasi është cënuar siguria kombëtare me këtë pajisje të paligjshme, që vetëm Prokuroria ka të drejtën të autorizojë përgjime sipas ligjit.
“Nuk e besoja në fakt kur e pashë në media para disa ditësh. Tashmë i konfirmuar që ky mekanizëm ilegal qenka prezent dhe funksionon. Ky përbën shqetësim të madh për gjithë shoqërinë tonë. Nga kjo sallë i kërkoj zyrtarisht Prokurorisë që të mbrojë dinjitetin e shtetit dhe qytetarëve të tij. Të hetohet gjithë procesi i sjelljes në Shqipëri të kësaj pajisje, kush ka qenë ai autoritet doganor që ka lejuar të vijë në Shqipëri pajisjen, që në cdo rast duhet të hyjë më lejen e prokurorisë.
I kërkoj prokurorisë të hetojë deri në fund, të hetojë zyrtarët që kanë përdorur këtë pajisje të paligjshme. Pajisja ka cënuar sigurinë kombëtare të Shqipërisë. Ka kërcënuar integritetin e të gjitha institucioneve, cdo qytetari të thjeshtë. Një pajisje e tillë s’mund të vijë në Shqipëri dhe të vihet në dispozicion pa leje nga prokuroria. I bëj thirrje institucioneve që pengojnë hetimet, të mos bëhen pengesë e funksionimit të ligjit në Shqipëri, cdo akt që pengon hetimin do të përballet me ligjin”, tha Presidenti Nishani.
Hetimet për këtë pajisje nisën pas një alarmi të dhënë nga SHISH se në Drejtorinë e Përgjithshme të Policisë së Shtetit ndodhet pajisja përgjuese ilegale, që është përdorur nga policia për të përgjuar zyrtarë të lartë të shtetit dhe drejtues mediash e gazetarë.
