Ministri i Brendshëm Saimir Tahiri është vënë në qendër të diskutimeve në mbledhjen e sotme të grupit parlamentar të Partisë Socialiste.
Në mbledhje është diskutuar kryesisht për pajisjen ilegale të përgjimeve që disponon Policia e Shtetit dhe që pretendohet se janë përgjuar zyrtarë të lartë të shtetit, politikanë të ndryshëm, drejtues mediash e gazetarë.
Deputetët socialistë i kanë kërkuar llogari Tahirit si qëndron e vërteta për këtë çështje. Ndërsa ministri i Brendshëm ka pranuar se kjo pajisje ekziston, por ka këmbëngulur se nuk është përdorur për përgjime, por vetëm për trajnime të policisë shqiptare në bashkëpunim me policinë italiane.
Ky pretendim i ministrit Tahiri mbetet për t’u parë në përfundim të hetimeve të Prokurorisë.
