Nga Ledio Braho*
Mbrëmja e të enjtes rezultoi fatale për Kryetarin e Bashkisë së Peshkopisë. Një funksionar publik i zgjedhur me votë nga qytetarët e Peshkopisë nuk i përmbajti dot epshet seksuale përpara një të reje punëkërkuese. Kryetari i Bashkisë së Peshkopisë ishte i gatshëm që të shtonte në organikën e institucionit të tij një vend të ri pune të saposhkrirë me marrjen e detyrës nga ana e tij enkas për të përfituar seksualisht. Në rastin konkret sa i përket subjektit aktiv (kryetarit) patjetër që jemi në kushtet e konsumit të elementeve të të figurës së veprës penale të “korrupsionit pasiv të funksionarëve të lartë shtetërorë ose të zgjedhurve vendorë”, por gjithsesi ajo çka është për t’u trajtuar ka të bëjë me të gjithë ato të larguar nga puna (me zgjidhje individuale apo kolektive të kontratës së punës ose lirim nga shërbimi civil) pas marrjes së detyrës nga Shukriu.
Për të gjithë ata punëmarrës marrëdhëniet e punës të të cilëve rregulloheshin nga Kodi Punës, me apo pa procedura dhe afate njoftimi të respektuara nga Bashkia Peshkopi, që nga dita e sotme kanë të drejtë t’i drejtohen Gjykatës Administrative të Tiranës me padi me objekt “Dëmshpërblim për zgjidhje të kontratës së punës pa shkaqe të arsyeshme në masën e një viti pagë dhe rikthim në vendin e punës”. Një e drejtë e tillë lind pikërisht për shkak të nenit 146 të këtij kodi që rrallëherë mund të jetë aplikuar në jurisprudencën shqiptare për shkak të specifikës së motivit abuziv. Në rastin konkret jemi në kushtet e motiveve të pandashme nga personaliteti i punëmarrësit, por që nuk kanë lidhje legjitime me raportet e punës siç janë seksi, mosha, gjendja civile dhe gjendja shoqërore. Normalisht çdo mashkull i punësuar në Bashkinë Peshkopi mund ta ngrejë si pretendim se është larguar nga puna për shkak se nuk është femër, po ashtu çdo femër mbi 20 vjeç mund të ngreje si pretendim faktin që nuk është 20 vjeç dhe kjo nuk përputhej me shijet e kryetarit për të vazhduar më tej me motive si gjendja civile dhe ajo shoqërore që doemos duhet të plotësojnë disa kritere specifike për t’u përputhur sërish me shijet e kryetarit.
Afati 30 ditor nga sot vjen si pasojë e zbulimit të motivit abuziv vetëm mbrëmë në darke kur kryetari me zë dhe me figurë e qartësoi se cilët ishin kriteret për të shkrirë një vend pune në organikën e Bashkisë apo për ta shtuar atë dhe kjo nuk po ndodhte vetëm në rastin e videos, por siç pohonte ai edhe në raste të mëparshme.
Për këtë arsye, kushdo që është larguar nga puna nga Bashkia e Peshkopisë nga ardhja e Shukriut e në vijim legjitimohet të marrë gjer në një vit paga dëmshpërblim e si rrallëherë të ketë mundësinë për t’u rikthyer në vendin e punës në një marrëdhënie që rregullohet me Kod Pune.
Situata është edhe më komode për të gjithë ata të larguar që kanë gëzuar në momentin e largimit statusin e nëpunësit civil pasi institucionet shtetërore duhet të sigurojnë kushtet për mbrojtjen e integritetit fizik, moral dhe dinjitetit të nëpunësit civil, që në rastin tonë nga një institucion me një titullar të tillë kurrsesi nuk mund të pretendohet se këto kushte janë siguruar.
Shukriu, me veprimet e tij, është i dënueshëm moralisht dhe ligjërisht, por të paktën do të vërë një standard në jurisprudencën e të drejtës së punës, rasti tipik i zbatimit të nenit 146 të Kodit të Punës (ndryshe “neni Shukriu”). Është e vërtetë që kjo është një faturë që do të paguhet nga qytetarët, sidomos nga ata të Peshkopisë, por fundja është një detyrim që i ka lindur për zgjedhjen e gabuar që kanë bërë. Ndoshta ky moment duhet të shërbejë që të gjithë ne ta kuptojmë që vota është e shenjtë pasi një votë e çuar dëm për një thes miell apo grusht me lekë do të na cënojë nderin në një moment të dytë dhe sado mllef të kemi, sërish nuk do e ngjisim dot atë që thyhet për vajzat, motrat, nënat apo bashkëshortet tona.
*Autori është avokat pranë Dhomës së Avokatisë Tiranë
