Gazetari Leonard Bakillari është shpallur fitues i Çmimit të Parë të akorduar nga Bashkimi Europian për Gazetarinë Investigative për vitin 2015, për artikullin e tij mbi korrupsionin në sistemin gjyqësor, të botuar në portalin e lajmeve reporter.al.
Çmimi i dytë shkoi për Ornela Liperi, gazetare në revistën ekonomike “Monitor”, për artikullin e saj mbi krizën financiare dhe gjendjen e borxhit të kompanive të biznesit në Shqipëri.
Çmimin për artikullin më të mirë për gazetarin më të ri investigativ shkoi për Habjon Hasani për raportimin në emisionin “Të paekspozuarit” në Ora News lidhur me koncesionet e naftës dhe efektet në ekonomi.
Ceremonia e dekorimit u zhvillua ditën e djeshme në Times Bookshop, Tiranë.
Në këtë konkurs morrën pjesë 29 shkrime investigative që u propozuan për çmimin e BE-së të këtij viti në Shqipëri, 18 prej të cilëve nga gazetarët nën 35 vjeç.
Juria ishte e përbërë nga pesë profesionistë të shquar të medias dhe përfaqësues të shoqërisë civile: Aleksandër Çipa, kreu i Unionit të Gazetarëve Shqiptarë, Lutfi Dervishi, ekspert i medias, Ani Ruci, Deutsche Ëelle korrespondent, Rrapo Zguri, profesor i gazetarisë dhe Lavdrim Lita, anëtar i HUB Politikave të BE-së.
Shef i Seksionit Politik, ekonomik dhe informacionit, Jan Rudolph tha se gazetaria investigative është një pjesë e rëndësishme e demokracisë së një vendi. “Liria e shprehjes dhe liria e medias nënkupton një angazhim për demokracinë, qeverisjen e mirë dhe përgjegjshmërinë politike. Këto janë disa nga parakushtet për një vend për t’u bërë pjesë e BE-së dhe një nga arsyet se pse secili nga ju të luajnë një rol të rëndësishëm duke krijuar standardet e BE”, tha Jan Rudolph.
Aleksander Cipa, kryetar i jurisë, vlerësoi vështirësitë që gazetarët investigativ përballen në një kohë kur puna e tyre është e një rëndësie të veçantë për shoqërinë tonë. Megjithatë, ai e konsideroi një shenjë e mirë që numri i nominimeve për çmimin është rritur, së bashku me faktin se shumica e gazetarëve janë të rinj, të cilën ai e konsideroi si një ogur të mirë për të ardhmen e gazetarisë investigative në vend.
Çmimi i BE-së për gazetarinë investigative do të jepet çdo vit në një periudhë prej tre vjetësh në secilin nga shtatë vendet e zgjerimit të BE-së: Shqipërisë, Bosnjes dhe Hercegovinës, Kosovës, Maqedonisë, Malit të Zi, Serbisë dhe Turqisë.
Skrimet investigative kontribuojnë në transparencën dhe raportimin mbi çështjet shoqërore që kanë të bëjnë me shpërdorim të pushtetit dhe të drejtave themelore, korrupsionit dhe krimit të organizuar.
