Çdo muaj, një familje shqiptare paguan 100 lekë të reja taksë për Radio Televizionin Shqiptar. Taksa është vendosur në faturën e energjisë elektrike dhe kemi parë se, krahas familjeve, këtë taksë e paguan çdo abonent me OSHEE-në, pavarësisht se ka apo jo televizor në shtëpi. Me këto të ardhura, që janë të konsiderueshme dhe variojnë në dhjetëra milionë euro, prezupozohet të mirëmbahet rrjeti i RTSH-së,apo pagat e punonjësve. Kohët e fundit, administrata e këtij televizioni shtetëror, ka bërë disa tender të debatuar, si ai që ka lidhje me dixhitalizimin, ku do të paguhen plot 22 milionë euro. Ndërkohë, është bërë tender edhe për kontratën e mirëmbajtjes, që kap shifrën e 8 milionë eurove, megjithëse nuk ka filluar ndërtimi i rrjetit të dixhitalizimit.
Si për të mos mjaftuar këto skandale, RTSH-ja ka vijuar të ketë “dorë të lirë” për të bërë çfarëdolloj tenderi. Sipas dokumenteve që
disponon Bold News, RTSH-ja ka hapur një procedurë në Agjencinë e Prokurimit Publik me objekt të prokurimit “blerje biletë ajrore për shërbim jashtë vendit, e shoqëruar me siguracionin e udhëtimit”. Në dokument thuhet se fondi limit në total për 24 muaj është “30.466.666.66” lekë pa tvsh. Lekët vijnë pikërisht nga buxheti i RTSH-së, që është pikërisht taksa e shumë debatuar e vendosur në faturën e energjisë elektrike. Data e zhvillimit të tenderit do të jetë më 30 maj në orën 10.00 në ambientet e RTSH-së. Ndrkohë, tenderi i dixhitalizimit të RTSH-së filloi në qershor të vitit 2013 nga ish-ministri i Inovacionit, Genc Pollo. Ky tender përfundoi në dyert e gjykatës dhe e fitoi kompania Rohde & Schëartz.
Qeveria “Rama”, në këtë rast ministrja Milena Harito, nuk paraqiti apelim. Juristët e morën apriori dhe e zbatuan. Më 9 mars 2015 u nënshkrua kontrata dhe nga ajo datë, e deri më sot, nuk është bërë asnjë gjë. Edhe sot, pavarësisht se nuk është bërë asnjë gjë, mendohet të bëhet mirëmbajtja e kësaj që nuk është bërë. Këshilli Drejtues i RTSH ka tentuar shumë herë që të marrë vendim për aprovimin e SLA-së (mirëmbajtja), duke insistuar, por asnjëherë nuk ka marrë asnjë vendim.
Në vijim të vendimit të fundit të Këshillit Drejtues, është hapur edhe tenderi kërkesë për propozim me objekt prokurimi konsulencë ligjore për kontratën e marsit 2015 të RTSH-së, konsulencë me veprim pas veprimi. Është bërë kontratë prej 2.4 milionë lekësh të reja, për ti hapur rrugën vjedhjes të kontratës së mirëmbajtjes. Edhe sot që po shkruajmë këto radhë, procesi i dixhitalizimit nuk ka filluar ende,ndërkohë që sipas BE-së duhet të përfundonte një vit më parë!
