Ambasadorët e SHBA-së dhe BE-së në Tiranë, Donald Lu dhe Romana Vlahutin do të jenë të pranishëm sot në mbledhjet e grupeve parlamentare të Partisë Socialiste, në orën 15:00 dhe Lëvizjes Socialiste për Integrim, në orën 17:00. Ndërsa me grupin e Partisë Demokratike mbledhja është parashikuar për të mërkurën ora 10:00.
Prania e pazakontë e diplomatëve të lartë të Shteteve të Bashkuara dhe Bashkimit Europian në mbledhjet e grupeve kuvendore lidhet me angazhimin e lartë të tyre për finalizimin e reformës në drejtësi.
Mbrëmjen e së hënës, nënkryetarët e grupeve parlamentare të PS-së dhe PD-së, përkatësisht Taulant Balla dhe Eduard Halimi nuk shfaqën asnjë shqetësim për praninë e ambasadorëve, duke u shprehur se ata janë të mirëpritur në çdo kohë. Ndërsa më herët kjo lëvizje e ndërkombëtarëve shkaktoi reagime.
Miratimi në parim me votë unanime i paketës kushtetuese shënoi një hap të rëndësishëm drejt përfundimit të reformës në sistemin e drejtësisë, duke i hapur rrugën diskutimit nen për nen të draftit.
Ky zhvillim pozitiv u përshëndet nga ambasadorët Lu dhe Vlahutin dhe nga drejtuesit e maxhorancës qeverisëse, kryeparlamentari Ilir Meta dhe kryeministri Edi Rama. Kryetari i PD-së, Lulzim Basha, nga ana e tij tha se zgjedhjet e lira e të ndershme janë kushti kryesor për çdo reformë tjetër.
Nënkryetari i grupit demokrat Eduard Halimi, sqaroi të hënën në mbrëmje se Partia Demokratike nuk e kushtëzon reformën në drejtësi me atë zgjedhore, por thotë që këto dy reforma do të duhet të ecin paralelisht me njëra-tjetrën
