Shpresat e Danny Welbeck për të luajtur me Anglinë në Euro 2016 kanë marrë një goditje të rëndë, pasi sulmuesi i Arsenalit pësoi një tjetër dëmtim në gjurin e djathtë, gjatë ndeshjes së barazuar kundër Mancester City. Welbeck, që u rikthye të luajë në fund të muajit shkurt pas 10 muajsh mungesë, u dëmtua gjatë një përplasje me Bacary Sagna. 25-vjeçari ishte i përlotur në momentin që mori ndihmën mjekësore. Welbeck tentoi të vazhdonte të luante, por më pas sinjalizoi trajneri Wenger se kishte nevojë për zëvendësim, në minutën e shtatë të ndeshjes në “Ettihad Stadium”.
Danny Welbeck u dëmtua në minutën e shtatë të ndeshjes ndaj City Welbeck do të bëj një kontroll të detajuar mjekësor ditën e hënë, por trajneri Arsene Wenger ka frikë se futbollisti i tij ka pësuar një dëmtim që i cenon mundësinë për të luajtur në Euro 2016. “Shenjat e para duken si një dëmtim në menisk. Jam disi i shqetësuar, – tha Wenger. – Danny është një djalë i fortë, ne u përpoqëm ta mbajmë në fushë, por na tha se e kishte të pamundur të vazhdonte lojën. E takova në pushim, ishte i mëritur dhe kishte dhimbje. Lajmi i mirë do të ishte që ai nuk do të humbasë Euro 2016, lajmi i keq është që do të mungojë. Nuk e di çfarë të them, edhe pse nga natyra jam gjithmonë optimist. Të presim dhe të shohim.”
