Fituesi i çmimit “Nobel” në letërsi, shkrimtari turk, Orhan Pamuk, në një intervistë për të përditshmen italiane “La Repubblica” shprehet i shqetësuar për lirinë e shtypit dhe shton se në vend mbizotëron frika. Sipas tij, qeveria e Partisë për Drejtësi dhe Zhvillim çdo ditë e më shumë po rrëshqet drejt autoritarizmit. Pamuk thotë se ndihet i frikësuar për të ardhmen e vendit të tij, sidomos përsa i përket respektimit të të drejtave të njeriut.
Ai fton vendet e Bashkimit Europian që të jenë më kritikë dhe të rrisin presionin e tyre ndaj Ankarasë sidomos për çështjet që kanë të bëjnë me respektimin e vlerave themelore të demokracisë dhe respektimin e të drejtave të njeriut. “Vendet e Bashkimit Europian duhet të mbajnë një qëndrim më të ashpër ndaj Turqisë për çështje që kanë të bëjnë me respektimin e të drejtave të njeriut. Po përpiqen me të gjitha mënyrat që të arrijnë një marrëveshje me Ankaranë për çështjen e emigrantëve. Shpresoj që liderët europianë, kur të shtërngojnë duart me homologët e tyre turq, t’u rikujtojnë atyre respektimin e lirisë së fjalës. Kancelarja gjermane, Angela Merkel dhe drejtuesit e tjerë të Europës, nuk duhet të përqendrohen vetëm tek zgjidhja e krizës së refugjatëve sirianë, por dhe të diskutojnë dhe të ndikojnë mbi qeverinë tonë, për problemin e demokracisë në vend”, thotë Pamuk.
Në intervistën e tij për të përditshmen italiane, Pamuk nënvizon se personalisht nuk i druhet asgjëjë, ndërsa nuk e fsheh frikën për të ardhmen e Turqisë. “Personalisht nuk i druhem asgjëje. Nuk kam aspak frikë për veten time. Por jam i frikësuar për të ardhmen e vendit tim, për miqtë e mi, për turqit laikë, intelektualët e vendit tim dhe të gjithë ata që mbështesin proceset integruese të vendit tim”, rrëfehet nobelisti turk.
Ndërkohë duke u ndalur tek liria e shtypit, Pamuk thotë se në vend mbizotëron frika dhe se pushteti po i mbyll gojën çdo zëri opozitar dhe në veçanti gazetarëve. “Personalisht jam shumë i shqetësuar për lirinë e shtypit dhe medias. Frika ndikon tek gazetarët që kritikojnë qeverinë, ata janë nën kërcënime të vazhdueshme për largime nga puna dhe mbyllje të gazetave dhe mediave të tyre. Vitet e fundit, qeveria jonë, pro-islamike, po humbet çdo ditë e më shumë ‘fytyrën’ e saj liberale dhe po bëhet përditë e më tepër autoritare dhe shtypëse”, nënvizon ai.
Ai nuk e fsheh faktin se ndihet i lodhur dhe tejet i mërzitur duke shkruar në gjykata për të mbrojtur veten, apo miqtë e tij. “Jam lodhur duke shkuar në gjykata për të mbrojtur veten time apo miqtë e mi. Këtu (në Turqi) flasin shumë për Turqinë e re. Atëherë, kjo është Turqia e re? Një vazhdim i asaj të vjetrës?! Një vend që dënon shkrimtarët?!”, shprehet Pamuk, ndërsa nënvizon faktin se vetëm në periudhën e fundit mbi 2 mijë persona përballen me akuza për fyerje të Presidentit, ndërsa gazetarë dhe intelektualë të shquar gjithashtu po përballen me akuza dhe rrezikojnë të dënohen me burgim deri në disa vite.
I pyetur se cila mund të jetë e ardhmja e vendit të tij, Pamuk shprehet i pasigurtë, ndërsa nuk e fsheh frikën. Sipas tij, situata aktuale është mjaftueshëm dëshpëruese për demokracisë dhe të ardhmen e vendit.
“Në Turqi mbizotëron frika, pushteti i mbyll gojën opozitës dhe gazetarëve. Europa duhet të ngrejë zërin”.
Pëgjithësisht jam një person që thotë “Në rregull, mund të diskutojmë, por mundësisht vetëm për tema që kanë të bëjnë me letërsinë. Mirëpo, ç’farë mund të bëj në një situatë të tillë? Tashmë është e pamundur që të flitet vetëm për letërsinë. Atëherë le të flasim për çështje që kanë të bëjnë me politikën”. Ai është nshkrimtar i përmasave bëtorërore dhe mbi të gjitha një njeri tepër kurajoz. Orhan Pamuk, tashmë 64 vjeç, fitues i çmimit Nobel në letërsi para 10 vitesh, padyshim një ndër shkrimtarët më të mirë turq, i cili në të kaluarën është kërcënuar me jetë për shkak të deklaratave të tij mbi çështje të tilla si ajo e genocidit ndaj armenëve dhe masakrave ndaj kurdëve. Në intervistën e tij për “La Repubblica” nuk shfaqet aspak i rezervuar në ato që thotë, përkundrazi tregohet mjaft i hapur dhe bën një analizë “pa dorashka” të situatës komplekse në të cilën po kalon Turqia. Autori i romanit më të fundit “Një ndjesi e pazakontë në mendjen time”, (i botuar së fundmi dhe në gjuhën italiane nga Einaudi), ai sapo ka shoqëruar në sallën e gjykatës së Stambollit, akademikun Murat Belge, një eseist dhe shkrimtar i shquar, por që për fat të keq njihet shumë pak jashtë Turqisë, autori i shumë librave dhe një nga studiuesit më të mirë mbi çështje që kanë të bëjnë me influencën e ushtrisë në jetën politike të Turqisë.
Belge akuzohet nga presidenti konservator i Turqisë, Rexhep Tajjip Erdogan për fyerje ndaj tij në artikujt e tij të botuar në të përditshmen turke “Taraf”. “Një akuzë e tillë është e pakuptimtë, shprehet Pamuk. Unë e njoh shumë mirë Belge. Ai është një nga studiuesit më të rëndësishëm dhe më seriozë të vendit tonë. Përveçse është një mik shumë i ngushtë i imi, kam mbi 50 vite që lexoj më ëndje artikujt e tij dhe kam mësuar shumë prej tij”.
Atëherë cilat janë akuzat e ngritura ndaj tij?
E gjitha nuk ka të bëjë fare me fyerje apo ofendim të Presidentit. Çështja është shumë më e thjeshtë. Kërkohet t’i mbyllet goja çdo zëri opozitar, opozitës politikë në vend dhe synohet të goditet liria e mendimit dhe e shprehjes. Përmes këtyre veprimeve synohet që të frikësohet publiku dhe në vend të mbizotërojë ndjenja e frikës deri në atë pikë sa askush të mos guxojë të kritikojë qeverinë.
Po ju nga se keni frikë?
Personalisht nuk i druhem asgjëje. Nuk kam aspak frikë për veten. Por, sigurisht ndihem i frikësuar për të ardhmen e vendit tim, për miqtë e mi, për turqit laikë, intelektualët e vendit tim dhe të gjithë ata që mbështesin proceset integruese të vendit tim.
Liria e mendimit dhe e shprehjes është më e vështirë dhe më e pamundur në Turqi?
Personalisht jam shumë i shqetësuar për lirinë e shtypit dhe medias. Frika sidoqoftë ndikon tek gazetarët që kritikojnë qeverinë. Ata përballen me kërcënime të vazhdueshme për largime nga puna dhe mbyllje të gazetave dhe mediave të tyre. Vitet e fundit, qeveria jonë, po humbet çdo ditë e më shumë ‘fytyrën’ e saj liberale dhe po rrëshqet drejt autoritarizmit dhe po tiranisë.
Por ju e dini që kjo tashmë i përket së kaluarës, në rastin tuaj, apo jo?
“Po, por jam lodhur duke shkuar në gjykata për të mbrojtur veten time apo miqtë e mi. Këtu (në Turqi) flitet shumë për Turqinë e re. Atëherë, dua t’i pyes, kjo është Turqia e re? Një vazhdim i asaj të vjetrës?! Një vend që dënon shkrimtarët?!”. Rastet janë të shumta dhe janë shndërruar në diçka normale në vendin tim. Gati 2 mijë persona, ndër të cilët edhe studentë, po përballen dhe akuzohen për fyerje të Presidentit dhe po përballen me këto akuza në gjykatë. Murat Belge është vetëm rasti i fundit. E njëjta gjë ka ndodhur dhe me Xhengiz Chandar (Cengiz Candar), i cili rrezikon të dënohet me disa vite burg me të njëjtën akuzë. Ose siç është rasti i drejtorit të gazetës “Cumhuriyet”, Xhan Dyndar (Can Dündar), i cili botoi një artikull investigues për trafikun e armëve drejt Sirisë dhe përfshirjen e shërbimeve sekrete turke në këtë trafik. E gjitha kjo ngjan me një dallgë që rritet dhe që akush nuk mund ta ndalë dot.
Çfarë do të ndodhë më pas?
Ju lutem, mos më pyesni çfarë do të ndodhi në të ardhmen. Ajo që po ndodh tani është mjaftueshëm dëshpëruese.
Turqia dhe Europa, sapo kanë përfunduar një marrëveshje shumë të rëndësishme për liberalizimin e vizave dhe lëvizjen e lirë të qytetarëve në Europë. Ju kënaq ky fakt?
Po, jam shumë i lumtur për këtë hap të rëndësishëm për heqjen e vizave. Por, nga ana tjetër më shqetëson fakti se mund të lindin mosmarrëveshje të tjera ndërmjet një qeverie turke gjithnjë e më autoritare dhe Bashkimit Europian, sepse kjo është një marrëveshje shumë e vështirë për t’u realizuar. Duket sikur europianët nuk duan të kenë rreth tyre, apo në mesin e tyre, sirianë dhe aziatikë dhe së fundmi as kurdë apo turq. Dhe kjo nuk është aspak një ndjesi e mirë.
Sipas jush, çfarë duhet të bëjnë vendet e Bashkimit Europian?
Si fillim, duhet të mbajnë një qëndrim më serioz në raport me Turqinë, pikërisht për çështje që kanë të bëjnë me respektimin e të drejtave të njeriut. Ata, po përpiqen me të gjitha mënyrat që të arrijnë një marrëveshje me Ankaranë për emigrantët. Shpresoj që liderët europianë, kur të shtërngojnë duart me homologët e tyre turq, t’u rikujtojnë atyre respektimin e lirisë së fjalës dhe të drejtat e jeriut. Kancelarja gjermane Angela Merkel dhe drejtuesit e tjerë eurpianë nuk duhet të përqendrohen vetëm tek çështja e krizës së refugjatëve sirianë, por të diskutojnë dhe të ushtrojnë presion mbi qeverinë tonë dhe për për problemin e demokracisë në vend.
Shumë mirë. Sipas jush, si po sillet Europa me krizën e refugjatëve?
Europa, përmes mureve që po ngre rreth vetes, po gërryen, shrrënjos kriteret e saj me vlerë.
Po Turqia?
Përsa i përket çështjes së menaxhimit të krizës së refugjatëve, nuk kam arsye që të kritikoj qeverinë tonë. Nuk kam arsye të fajësoj askënd në vendin tim. Për një periudhë relativisht të gjatë kohore, Ankaraja është lënë e vetme në përballimin e barrës së miliona refugjatëve të ardhur nga jashtë: ajo është e ka përballuar e vetme të gjithë këtë fluks. Sjellja e Turqisë në këtë rast meriton të gjitha lëvdatat