Është përfshirë edhe emri i Roberto Mancini-t në listën e kandidatëve të mundshëm për të marrë drejtimin e PSG-së, që pritet t’i thotë lamtumirë trajnerit Laurent Blanc në fundin e këtij sezoni. Sipas të përditshmes franceze “Le Parisien”, tekniku i Inter-it është një nga favoritët, bashkë me Jose Mourinho dhe Andre Villa-Boas, për të drejtuar Parisin në sezonin e ardhshëm. “Mancio” ka një kontratë me zikaltrit deri në 2017-ën, por duket se klubi milanez nuk ka ndërmend t’i ofrojë rinovimin.
Thohir ka thënë disa herë se synon të respektojë kontratën dhe për rrjedhojë ka dëshirë të vazhdojë bashkëpunimin me Mancini-n edhe sezonin e ardhshëm. Por paraqitja e bërë këtë vit nga ekipi ka qenë shumë larg asaj që priste klubi dhe prej kohësh kanë filluar të qarkullojnë zërat që flasin për një lamtumirë të parakohshme të “Mancio”-s. Ai është përfolur edhe si pasardhësi i mundshëm i Antonio Conte-s në drejtim të kombëtares së Italisë. Por nga Franca ka ardhur lajmi se PSG po mendon pikërisht për teknikun e Inter për sezonin e ardhshëm.
