Qindra versione të perimeve dhe frutave të ngrira po tërhiqen nga tregu pasi zyrtarët federalë të shëndetësisë zbuluan lidhjen e konsumimit të tyre me listerinë. Tetë persona janë shtruar në spital, ndërsa dy prej tyre kanë ndërruar jetë në SHBA.
Tërheqja nga tregu përfshin 358 produkte të 42 markave të ndryshme, të cilat janë shitur nga një kompani me bazë në Uashington.
Produktet e tërhequra nga tregu nga vetë kompania kanë data skadence që nisin nga 26 prilli 2016 deri në 26 prill 2018. Këto produkte janë shitur në 50 shtetet e Amerikës dhe në provincat kanadeze: Alberta, British Columbia, Manitoba dhe Saskatchewan.
Bakteri Listeria u zbulua fillimisht nga Qendra Amerikane për Kontrollin dhe Parandalimin e Sëmundjeve.
Listeria shkakton ethe, dhimbje të forta koke, dhimbje barku dhe diarre te të rriturit e shëndetshëm dhe mund të jetë fatale për fëmijët apo personat me sistem imunitar të dobët. Te gratë shtatzëna, listeria mund të bëhet shkak për abort ose lindje të parakohshme.
