Një video e një tentative grabitje nën kërcënimin e armës, e publikuar së fundmi është shembulli më i mirë se për mbrojtjen tuaj së pari duhet të jeni vetë të përgatitur, e të mos prisni ndihmë nga policia. Videoja e filmuar 1 vit më parë por e publikuar sot nga Vizion plus tregon forcat speciale “Shqiponja” që ishin vënë në ndjekje të dy personave, pasi kryenin veprime të dyshimta dhe duket se po bëheshin gati të kryenin një grabitje.
Pasi e pikasën se po ndiqeshin nga policia Eduard Kacolli dhe Ndue Ndoi qëlluan ne drejtim të uniformave blu e në tentativë për t’u larguar u futën në rrugicën që lidh “Islam Allën” me “Himë Kollin”. Nën kërcënimin e armës, ata ndaluan një drejtues motori për t’i marrë mjetin, por ajo që ndodhi më pas do t’iu habisë. Jo vetëm reagimi i drejtuesit te motorit, por edhe i forcave “Shqiponja”.
Sipas komunikatës zyrtare te policisë veprimi i drejtuesit te motorit neutralizoi grabitësin, kjo dhe fale ndihmës së policisë, e cila ishte vënë në ndjekje. Por pamjet tregojnë se fale ndihmës së qytetarit, i cili ne fakt po mbronte mjetin e tij, policia arrestoi 4 persona, përfshirë dhe atë që arriti të largohej me motor. Të gjithë janë të akuzuar për një sërë grabitjesh me dhunë.
