Shqipëria e De Biasi debuton në Europë duke u bërë pjesë e futbollit të rëndësishëm. Kështu cilësohet Kombëtarja në emisionin “Kodi i Kuq” në Sky Sport, i drejtuar nga ish-futbollisti, Gianluca Viali.
Seria e radhës i është kushtuar suprizave të këtij sezoni ku përfshihet, Leicester, Alessandria dhe Shqipëria. Gianni De Biasi në intervistën e dhënë përmendi faktin se ky ekip bashkoi të gjithë shqiptarët, duke i dhuruar kënaqësinë e pjesëmarrjes në finalet e Europianit.
Gianni De Biasi, Trajner i Kombëtares: “Ishte një bashkim i një populli në një flamur të vetëm, i cili ishte shpërndarë në të gjithë botën për shkak të së kaluarës. Tani të gjithë e shikojnë Shqipërinë me një sy tjetër.”
Në mendimet e futbollistëve dhe gazetarëve italianë një arritje e tillë shikohet si një mrekulli. Ata vlerësojnë punën e Gianni De Biasi dhe stafit të tij që bindi lojtarë me të afërm me origjinë shqiptare, por të lindur jashtë që të luanin për kombin e tyre. Trajneri dhe lojtarët duan të bëjnë të tjera surpriza në Francë, duke shfrytëzuar cilësinë më të mirë, shpirtin e grupit.
