Luis Suarez ka një shans të shkojë në një rekord historik sonte, kundër Betis. Që të ndodhë kjo, ai duhet të realizojë një minimum prej tre golash.
Sfida duket e madhe, por në rastin e Luis Suarez, duke parë “pokerat” e dy ndeshjeve të fundit, nuk është aspak e paarsyeshme. Me një “hat-trick”, uruguajani do të jetë i barabartë me Isidro Langara, lojtari i vetëm në histori, i cili për tri ndeshje rresht ka shënuar më shumë se nga tre gola. Kjo ndodhi në sezonin 1934-1935, në mes të javëve 9 dhe 11 të kampionatit.
Futbollisti, që militonte në Oviedo, shënoi 10 gola në tri ndeshje radhazi, asokohe. Suarez ka një shans të madh për të thyer këtë rekord mbi 80-vjeçar dhe finalizuar luftën e golashënuesit më të mirë në La Liga, por edhe në Europë. Mungesa e Cristiano Ronaldos, i cili i ka humbur tashmë dy ndeshjet e fundit për shkak të lëndimit (ndaj nuk do të jetë në “Anoeta”, edhe këtë mbrëmje), duhet shfrytëzuar maksimalisht nga sulmuesi i Barcelonës.
Aktualisht, Suarez kryeson listën e shënuesve më të mirë në kampionatin spanjoll, me 34 gola, nga 31 të tillë që ka portugezi i Real Madridit. I treti në garë është Leo Messi, me 25 gola. “Trofeu që po ndiqet me këmbëngulje nga Suarez është titulli kampion në Spanjë. Nëse do të fitojë edhe “Këpucën e Artë”, do të ishte e mrekullueshme, por çdo gjë shkon së bashku”, – tha Luis Enrique në konferencën e djeshme për shtyp.
