Ish- truproja personal i Sali Berishës, Izet Haxhia njëri ndër njerëzit më të afërt të ish- kryeministrit për vite me radhë tregon se cilat janë lidhjet e Sali Berishës dhe si ai i merr vesh para policisë dhe para medias lajmet më të fundit që ndodhin në vend.
Izet Haxhia shkruan se Presidenti i Republikës, SHISH-i dhe KLD-ja janë institucione që ende janë nën varësinë e Sali Berishës.
“Disa mund të habiten, disa të tjerë të egzaltohen se ku dhe si është e mundur që marshalli na thotë habere që nuk i di as qeveria e as mediat. Nuk ka asgjë për tu habitur apo ekzaltuar. Sot në këtë palo shtet që kemi ndërtuar gjithçka është e mundur. Është e mundur sepse krahas atij shtetit të ligjshëm që kemi në dukje, në vendin tonë vazhdojnë të funksionojnë me eficiencë të plotë disa “shtete” paralele ,ku ai më aktivi, më kriminali dhe më i rrezikshmi është “shteti” paralel i marshallit, ky shtet ka në funksion të tij Presidentin me KLD-në e korruptuar ka SHIK-un me veshin vigjilent të Ajazit dhe kamikazët e Gazidedes të cilët janë në veprimtari të plotë e intensive.
Nuk po flas këtu për “shtetin” paralel të Metës i cili me qetësi e dashuri vazhdon të mbushe arkën e partisë për blerje të reja votash në fushatën e ardhshme. Ka pothuajse dy vjet që të gjitha komunikimet e mija me anë të telefonit apo mediave sociale janë nën përgjimin 24 orë të “veshit” të marshallit . Lë të më përgjojnë sepse çdo gjë e imja është e hapur dhe nuk kam frike nga këto përgjime.
Por është e papranueshme për një shtet normal që një shef i shërbimit sekret që duhet të jetë palca kurrizore e një shteti të vihet në shërbim të një deputeti opozite apo kushdo qoftë ai, duke e furnizuar atë me të dhëna operative. Siç po shihet marshalli vazhdon të marrë zarfet me tre viza të kuqe që me ligj duhet t’i marrë vetëm Presidenti dhe kryeministri i vendit. Dikur veshi i marshallit, Gazidede, i dërgonte nga tre apo më shumë zarfe të tilla në ditë dhe mesa po shihet edhe veshi i ardhur nga Kanadaja vazhdon të njëjtën praktikë, sepse marshalli nuk jeton dot pa ushqim spiunësh, sepse ai është i mësuar me të tilla ushqime që kur bënte specializimin në Francë ku e pati dërguar partia e tij e dashur.
Mos e merrni për budalla apo për matuf, jo marshalli vetëm budalla nuk është, ai sot është edhe më i rrezikshëm seç ka qenë ndonjëherë. Marshalli sot ka në dorë organet më jetike të shtetit siç janë shërbimet sekrete dhe ato të drejtësisë, ai ka në shërbim të verbër të tij kamikazët e dikurshëm të SHIK-ut të Gazidedes që janë strehuar në SHISH-in e Ajazit, ata janë të gatshëm të hidhen në sulme destabilizuese sapo t’i nevojiten marshallit dhe duhet ta dini se marshalli është i pamëshirshëm në hakmarrjen e tij.
Ka ardhur momenti i fundit ku palloshi Rama ose të shkatërrojë këtë “shtet” paralel të marshallit ose të mbledhë poturet e të ikë atje ku iku pas drurit që hëngri po nga ata që sot i ka në shërbimin sekret të shtetit paralel të marshallit …”, shkruan Haxhia.
