Wikileaks ka publikuar disa dokumente interesante të agjencisë së sigurisë dhe konsulencës globale, Stratfor, që njihet ndryshe edhe si “CIA-s hije” e Amerikës.
Mes këtyre dokumentave botuar sot nga DITA janë disa emaile për Shqipërinë të shkëmbyera në 21 janarin e vrasjes së protestuesve, mes një analisti të kësaj organizate, të quajtur Marko Papiç, që informon për Shqipërinë dhe zv.presidentit Fred Burton.
Një seri e-mailesh shkëmbehen mes tyre në 21 janar me pyetjen “çfarë dreqin po ndodh në Shqipëri“
Papiç njofton se ka tre të vdekur dhe shpjegon ndër të tjera:
“Shoku, ky Berisha ishte president para anarkisë së vitit 1997. Ai është don-i (shefi) i mafies shqiptare. Shqipëria përgjithësisht nuk ka rëndësi. Megjithatë, është një shtet ku qeveria është një nga shumë grupe të krimit të organizuar, që konkurrojnë për pushtet. Anarkia është gjithmonë shumë pranë”.
Një ditë më pas, në 22 janar, Papiç informon shefin e tij se situata është e qetë.
Qendra kërkon informacion nga Papiç për ndikimin e Berishës në Kosovë e Maqedoni.
Analisti i Stratfor shkruan:
“Po flas në përgjithësi, Berisha nuk ka shumë rol në rajon. Ai vazhdon të shihet si model i liderit të vjetër. Qartësisht, Kosova do të ketë gjithmonë nevojë për mbështetjen e kryeministrit shqiptar dhe qeverisë së tij. Megjithatë shumë kosovarë mbajnë mend se Berisha i dha një mbështetje të vakët UÇK-së dhe besohet se ka përfituar personalisht duke lejuar ngarkesat me karburant në Serbi dhe Mal të Zi, pavarësisht embargos në atë kohë. Berisha akoma shihet si njeri me lidhje të ngushta me Serbinë- një nga kontaktet e tij më të ngushta është Damir Fazlliç, një personazh që mendohet se ka kontakte me nivelet më të larta në qeverinë serbe. Berisha nuk mendohet se ka lidhje të forta në Maqedoni dhe me humbjen e Gjukanoviç, ai ka kufizuar edhe ndikimin në Mal të Zi”.
I pyetur për Ramën, analisti raporton:
“Rama është i njohur si kokëfortë dhe deri diku si radikal mes komunitetit ndërkombëtar në Tiranë. Nuk është i mirë në dialog, duke krijuar situata ku asnjë palë nuk fiton. Pavarësisht këtyre dobësive, Rama përfaqëson liderin “modern” që shumë shqiptarë e kanë shpresuar që prej vitit 1990”.
Dita
